തിരുവനന്തപുരം: കേരളത്തില്‍ ഇന്നും മഴ ശക്തമായി തുടരുമെന്ന് കാലാവസ്ഥ വകുപ്പ്. എറണാകുളം, കോഴിക്കോട്, വയനാട് ജില്ലകളിലാകും ഇന്ന് ഏറ്റവും കൂടുതല്‍ മഴ ലഭിക്കുകയെന്നും മുന്നറിയിപ്പുണ്ട്. മൂന്ന് ജില്ലകളിലും 115.5 മില്ലി മീറ്റര്‍ വരെ മഴ ലഭിക്കാം. ഈ സാഹചര്യത്തില്‍ മൂന്നിടങ്ങളിലും ഇന്ന് യെല്ലോ അലര്‍ട്ട് പ്രഖ്യാപിച്ചു. ഒറ്റപ്പെട്ട ശക്തമായ മഴയ്‌ക്കുള്ള സാധ്യതയാണ് പ്രവചിക്കപ്പെട്ടിട്ടുള്ളത്. ഇടിമിന്നലിനും സാധ്യതയുണ്ടെന്നാണ് മുന്നറിയിപ്പ്.
ഇടിമിന്നല്‍ ജാഗ്രത നിര്‍ദേശം: ശക്തമായ മഴ ലഭിക്കുന്ന സമയത്തുണ്ടാകുന്ന ഇടിമിന്നല്‍ വളരെ അപകടകാരിയാണ്. അതുകൊണ്ട് ഇടിമിന്നലിന്‍റെ ആദ്യ ലക്ഷണം കണ്ടുതുടങ്ങുമ്പോള്‍ തന്നെ സുരക്ഷിതയിടങ്ങളിലേക്ക് മാറി നില്‍ക്കണം.