വയനാട്: തെരഞ്ഞെടുപ്പ് ആവേശം വാനോളമുയർത്താൻ കൊട്ടിക്കലാശത്തിന് പ്രിയങ്കക്കൊപ്പം ലോക്‌സഭാ പ്രതിപക്ഷ നേതാവ് രാഹുൽ ഗാന്ധിയും വയനാട്ടിലെത്തും. തിങ്കളാഴ്‌ച രാവിലെ 10 ന് സുൽത്താൻ ബത്തേരിയിലാണ് ഇരുവരും നയിക്കുന്ന റോഡ് ഷോ നടക്കുക. ഉച്ചക്ക് ശേഷം മൂന്ന് മണിക്ക് തിരുവമ്പാടി ഗ്രാമപഞ്ചായത്ത് ഓഫിസ് പരിസരത്ത് നിന്നും ബസ്‌റ്റാന്‍റിലേക്കും ഇരുവരും റോഡ് ഷോ നടത്തും.
അതേസമയം, പ്രിയങ്കാ ഗാന്ധിയുടെ മൂന്നാംഘട്ട പ്രചാരണത്തിന് ഞായറാഴ്‌ച വയനാട്ടിൽ തുടക്കമാവും. മൂന്ന് നിയോജക മണ്ഡലങ്ങളിലും പ്രിയങ്ക പ്രചാരണം നടത്തും. ഉച്ചയ്ക്ക് 12.20 ന് മാനന്തവാടി നിയോജക മണ്ഡലത്തിലെ എടവക, 12.50 ന് തരുവണ, 1.30 ന് കൽപ്പറ്റ നിയോജക മണ്ഡലത്തിലെ കോട്ടത്തറ വെണ്ണിയോട്, രണ്ടിന് കമ്പളക്കാട് എന്നിവിടങ്ങളിലെ പ്രചാരണ പരിപാടികളിൽ പ്രിയങ്ക ഗാന്ധി പങ്കെടുക്കും.