തിരുവനന്തപുരം: പെൺകുഞ്ഞിന്‍റെ ഭാവി സുരക്ഷിതമാക്കാനുള്ള വഴി തേടി അലയുകയാണോ നിങ്ങൾ? തൊട്ടടുത്ത തപാൽ ഓഫീസിൽ 250 രൂപ മുതൽ ആരംഭിക്കുന്ന നിക്ഷേപ പദ്ധതിയിൽ ചേര്‍ന്ന് കുഞ്ഞിന്‍റെ ഭാവി സ്വപ്‌നങ്ങൾക്ക് നിറം പകരാം. ഇതിനായി തപാൽ വകുപ്പും കേന്ദ്ര സർക്കാരും സംയുക്തമായി രൂപീകരിച്ച പദ്ധതിയാണ് സുകന്യ സമൃദ്ധി സമ്പാദ്യ പദ്ധതി.
പദ്ധതി പ്രകാരം രക്ഷിതാവിന് പരമാവധി രണ്ട് പെൺകുട്ടികളുടെ പേരിൽ ഓരോ അക്കൗണ്ട് തുടങ്ങാം. 250 രൂപ മുതൽ 1,50,000 രൂപ വരെ പ്രതിവർഷം നിക്ഷേപിക്കാനാകും. 10 വയസിൽ താഴെയുള്ള കുട്ടികളുടെ പേരിൽ മാത്രമെ അക്കൗണ്ട് തുടങ്ങാനാകൂ. അക്കൗണ്ട് തുടങ്ങി 14 വർഷം വരെ നിക്ഷേപം തുടരാം.
നിക്ഷേപിക്കുന്ന തുകയുടെ വാർഷിക പലിശ നിരക്ക് വർഷം തോറും അക്കൗണ്ടിലേക്ക് നിക്ഷേപമായെത്തും. കുട്ടിക്ക് 18 വയസ്‌ തികയുമ്പോഴോ 10ാം ക്ലാസ്‌ പാസാകുമ്പോഴോ വിദ്യാഭ്യാസ ചെലവിനായി ബാലൻസ് തുകയുടെ 50 ശതമാനം പിൻവലിക്കാനും പദ്ധതിയിലൂടെ സാധിക്കും. 21 വർഷമാണ് സമ്പാദ്യ പദ്ധതിയുടെ കാലാവധി.