കണ്ണൂര്‍: ജൂനിയര്‍ വിദ്യാര്‍ഥികളെ റാഗിങ് ചെയ്‌ത സംഭവത്തില്‍ പ്ലസ്‌ ടു വിദ്യാര്‍ഥികള്‍ അറസ്റ്റില്‍. കണ്ണൂരിലെ സര്‍ക്കാര്‍ എയ്‌ഡഡ്‌ ഹയര്‍ സെക്കന്‍ഡറി സ്‌കൂളിലെ മൂന്ന് വിദ്യാര്‍ഥികളെയാണ് അറസ്റ്റ് ചെയ്‌തത്. സ്‌കൂളിലെ അഞ്ച് ജൂനിയര്‍ വിദ്യാര്‍ഥികള്‍ക്കാണ് സീനിയേഴ്‌സിന്‍റെ ആക്രമണം ഉണ്ടായത്.
ഫെബ്രുവരി 12നാണ് കേസിനാസ്‌പദമായ സംഭവം. സീനിയേഴ്‌സിനെ ബഹുമാനിച്ചില്ലെന്നും അവര്‍ പറയുന്നത് അനുസരിച്ചില്ലെന്നും ചൂണ്ടിക്കാട്ടിയായിരുന്നു ആക്രമണമെന്ന് കൊളവല്ലൂർ പൊലീസ് പറഞ്ഞു. സംഭവത്തില്‍ മൂന്ന് വിദ്യാര്‍ഥികളാണ് അറസ്റ്റിലായത്. ആക്രമണത്തില്‍ ഒരു വിദ്യാര്‍ഥിയുടെ കൈയ്‌ക്ക് ഗുരുതര പരിക്കേറ്റിട്ടുണ്ടെന്നും നിലവില്‍ കുട്ടി ചികിത്സയിലാണെന്നും പൊലീസ് പറഞ്ഞു.