പാലക്കാട്: ഉപതെരഞ്ഞെടുപ്പ് പ്രചാരണത്തിന് പാലക്കാട്ടെത്തിയ കോണ്‍ഗ്രസ് നേതാക്കൾ താമസിച്ച ഹോട്ടലില്‍ പൊലീസ് നടത്തിയ പരിശോധനയ്‌ക്ക് പിന്നാലെ സ്ഥലത്ത് സംഘർഷാവസ്ഥ. തെരഞ്ഞെടുപ്പിനായി കള്ളപ്പണം എത്തിച്ചെന്ന പരാതിയിൽ ചൊവ്വാഴ്‌ച അര്‍ധരാത്രിയോടെയാണ് പൊലീസ് സംഘം ഹോട്ടലില്‍ പരിശോധനയ്‌ക്കെത്തിയത്.
പൊലീസ് പരിശോധനയ്ക്കിടെ സിപിഎം, ബിജെപി. നേതാക്കളും പ്രവര്‍ത്തകരും സ്ഥലത്തെത്തി. ഇത് സ്ഥലത്ത് സംഘര്‍ഷാവസ്ഥയുണ്ടാക്കി. കോൺഗ്രസ് നേതാക്കളായ ബിന്ദു കൃഷ്‌ണ, ഷാനിമോൾ ഉസ്‌മാൻ തുടങ്ങിയവരടക്കം ഹോട്ടലിലുണ്ടായിരുന്നു.
ബിന്ദു കൃഷ്‌ണയുടെയും ഷാനി മോൾ ഉസ്‌മാന്‍റെയും രുടെ മുറികളിലാണ് ആദ്യം പരിശോധന നടത്തിയത്. ഹോട്ടലിന്‍റെ മൂന്ന് നിലകളിലെ എല്ലാ മുറികളിൽ പൊലീസ് കയറി പരിശോധിച്ചു. ഇതിനിടെ സിപിഎം, ബിജെപി നേതാക്കളും പ്രവർത്തകരും സ്ഥലത്തെത്തി. തുടർന്ന് പ്രവർത്തകർ തമ്മിൽ നടന്ന വാക്‌പോര് കയ്യാങ്കളിയുടെ വക്കിലെത്തി.