'ദേശീയ പാതയോരത്തെ മരങ്ങള്‍ മുറിക്കണം, അപകടമുണ്ടായാല്‍ ഉത്തരവാദി ഡിഎഫ്‌ഒ': ഹൈവേ സംരക്ഷണ സമിതി - Trees In Kochi Dhanushkodi Highway

കൊച്ചി-ധനുഷ്‌കോടി ദേശീയപാതയോരത്തെ മരങ്ങള്‍ ഉടന്‍ മുറിച്ച് മാറ്റണമെന്ന് ഹൈവേ സംരക്ഷണ സമിതി. ആയിരക്കണക്കിന് പേര്‍ യാത്ര ചെയ്യുന്നതാണീ പാതയെന്ന് ചെയര്‍മാന്‍ പിഎം ബേബി. കലക്‌ടരുടെ ഉത്തരവിന് പുല്ലുവിലയാണ് വനം വകുപ്പ് നല്‍കുന്നതെന്നും ആരോപണം.

ഇടുക്കി: കൊച്ചി-ധനുഷ്‌കോടി ദേശീയപാതയില്‍ അപകടാവസ്ഥലയിലുള്ള മരങ്ങള്‍ മുറിച്ച് മാറ്റണമെന്ന് വനം വകുപ്പിനോട് ആവശ്യപ്പെട്ട് ഹൈവേ സംരക്ഷണ സമിതി ചെയര്‍മാന്‍ പിഎം ബേബി. നേര്യമംഗലം മുതല്‍ വാളറ വരെയുള്ള മരങ്ങള്‍ മുറിച്ച് മാറ്റണമെന്നാണ് ആവശ്യം. അടിമാലിയില്‍ മാധ്യമങ്ങളോട് സംസാരിക്കുകയായിരുന്നു അദ്ദേഹം.

അപകടാവസ്ഥയിലുള്ള മരങ്ങള്‍ മുറിച്ച് മാറ്റാന്‍ ജില്ല ഭരണകൂടം ഉത്തരവിട്ടെങ്കിലും വനം വകുപ്പ് നടപടിയെടുത്തിട്ടില്ലെന്ന് ബേബി പറഞ്ഞു. ഇത്തരം ഉദ്യോഗസ്ഥരെ തത്‌സ്ഥാനത്ത് നിന്നും നീക്കാന്‍ സര്‍ക്കാര്‍ തയ്യാറാകണം. ആയിരക്കണക്കിന് ജനങ്ങള്‍ യാത്ര ചെയ്യുന്ന പാതയാണിത്. മരങ്ങള്‍ വീണ് ഏതെങ്കിലും തരത്തില്‍ അപകടമുണ്ടായാല്‍ ഡിഎഫ്ഒ അടക്കമുള്ള ഉദ്യോഗസ്ഥരായിരിക്കും അതിന് ഉത്തരവാദികള്‍.

വിനോദ സഞ്ചാരികളും ഹൈറേഞ്ചിലെ ആളുകളും കൂടുതലായും ആശ്രയിക്കുന്ന പാതയാണിതെന്നും പിഎം ബേബി പറഞ്ഞു. ഹൈറേഞ്ചിലെ ഇത്തരത്തിലുള്ള നിരുത്തരവാദികളായ ഉദ്യോഗസ്ഥരെ മാറ്റി പകരം കാര്യപ്രാപ്‌തിയുള്ളവരെ നിയമിക്കണമെന്നും അദ്ദേഹം ആവശ്യപ്പെട്ടു.