എറണാകുളം: സർവീസുകളുടെ എണ്ണം കൂട്ടാനൊരുങ്ങി കൊച്ചി മെട്രോ. വർധിച്ചുവരുന്ന യാത്രക്കാരുടെ എണ്ണം കണക്കിലെടുത്താണ് ജൂലൈ 15 മുതൽ അധിക ട്രെയിനുകൾ ആരംഭിക്കുന്നതെന്ന് കെഎംആർഎൽ അറിയിച്ചു. ഈ വർഷം കൊച്ചി മെട്രോയിൽ ഇതിനകം 1,64,27,568 യാത്രക്കാർ യാത്ര ചെയ്‌ത് കഴിഞ്ഞുവെന്നാണ് റിപ്പോർട്ട്.
കഴിഞ്ഞ പത്ത് ദിവസമായി കൊച്ചി മെട്രോയ്ക്ക് പ്രതിദിനം 1 ലക്ഷത്തിലധികം യാത്രക്കാരെ ലഭിച്ചതിനാൽ, കൂടുതൽ സുഖകരവും സൗകര്യപ്രദവുമായ യാത്രാനുഭവം ഉറപ്പാക്കാനാണ് കൂടുതൽ സർവീസ് ആരംഭിക്കുന്നതെന്നും കെഎംആർഎൽ വ്യക്തമാക്കി. ജൂലൈ 15 മുതൽ ഒരു ദിവസം 12 ട്രിപ്പുകൾ കൂടുതൽ ആരംഭിക്കും.