തിരുവനന്തപുരം: വിജയക്കൊടി പാറിക്കാന്‍ വാശിയേറിയ പ്രചരണവും വാദ പ്രതിവാദങ്ങളുമായാണ് സ്ഥാനാര്‍ഥികള്‍ തെരഞ്ഞെടുപ്പ് കാലത്ത് സജീവമാകുന്നത്. എന്നാൽ തോല്‍വി ഉറപ്പാണെന്നറിഞ്ഞിട്ടും മത്സരിച്ച് വ്യത്യസ്‌തനാവുകയാണ് തമിഴ്‌നാട്, സേലം സ്വദേശി പത്മരാജന്. തൃശൂരില്‍ സുരേഷ് ഗോപിയോട് മത്സരിച്ച ശേഷം ഇനി രാജ്യസഭ തെരഞ്ഞെടുപ്പിലേക്കാണ് മത്സരം.
ഒറ്റ എംഎല്‍എമാരുടെയും പിന്തുണയില്ലാതെ സമര്‍പ്പിച്ച നാമനിര്‍ദ്ദേശ പത്രിക തള്ളുമെന്ന് ഉറപ്പായിട്ടും സേലത്ത് നിന്നും തിരുവനന്തപുരത്ത് എത്തി നിയമസഭ സെക്രട്ടറിക്ക് നാമനിര്‍ദ്ദേശ പത്രിക സമര്‍പ്പിച്ച് തന്‍റെ 241 -ാം തെരഞ്ഞെടുപ്പിന് തയ്യാറെടുക്കുകയാണ് സേലത്ത് ടയര്‍ കട നടത്തുന്ന പത്മരാജന്. ഏറ്റവും കൂടുതല്‍ തവണ തെരഞ്ഞെടുപ്പിന് നിന്ന് തോറ്റതിന് ലിംക ബുക്‌സ് ഓഫ് റെക്കോര്‍ഡ്‌സില്‍ ഇടം നേടിയ പത്മരാജന് 1988 മുതലാണ് തോറ്റ് തുടങ്ങാന്‍ ഇറങ്ങി പുറപ്പെടുന്നത്.