Published : Dec 2, 2024, 9:38 AM IST
കണ്ണൂർ: വളപട്ടണത്തെ വൻ മോഷണത്തിൽ പ്രതി പിടിയിൽ. അയൽവാസിയായ ലിജീഷിനെ ആണ് പൊലീസ് പിടികൂടിയത്. മോഷണം നടന്ന നാൾ മുതൽ ലിജീഷ് പൊലീസ് നിരീക്ഷണത്തിൽ ആയിരുന്നു. ഇന്നലെ രാത്രിയോടെയാണ് ലിജീഷിനെ പൊലീസ് അറസ്റ്റ് ചെയ്‌തത്.
മോഷണം നടന്ന സാഹചര്യവും രീതിയും പരിശോധിച്ചപ്പോൾ വീടിനെപ്പറ്റി ധാരണയുള്ള ഒരു വ്യക്തിയാണ് പിന്നിൽ എന്ന് പൊലീസിന് സംശയമുണ്ടായിരുന്നു. കൂടാതെ പൊലീസ് നായ മണം പിടിച്ചു പോയതും ഇയാളുടെ വീടിനു മുന്നിലൂടെയായിരുന്നു. സിസിടിവിയിൽ പെടാതെ അതിവിദഗ്‌ധമായിട്ടായിരുന്നു മോഷണം.
എവിടെയെല്ലാം ക്യാമറകൾ ഉണ്ട് എന്നറിഞ്ഞ് കൃത്യമായ അറിവോടെ ആയിരുന്നു മോഷണരീതി. ശേഷം വീടിന് പിന്നിലെ റെയിൽവേ ട്രാക്കിലൂടെ മോഷ്‌ടാവ് കടന്നുകളയുകയായിരുന്നു. ഇവയെല്ലാം പരിശോധിച്ച പൊലീസ് പ്രദേശത്തെക്കുറിച്ച് നന്നായി അറിയാവുന്ന ഒരാളാണ് മോഷണത്തിന് പിന്നിൽ എന്ന നിഗമനത്തിൽ എത്തിയിരുന്നു.
ഇതോടെ ആണ് ലിജീഷിലേക്ക് അന്വേഷണം എത്തിയത്. ഇയാളിൽ നിന്ന് മോഷണം പോയ സ്വർണവും പണവും കണ്ടെടുത്തു. അരി വ്യാപാരിയായ വളപട്ടണം മന്നയിലെ അഷ്‌റഫിന്‍റെ വീട്ടില്‍ നിന്നായിരുന്നു ഒരു കോടി രൂപയും 300 പവനും മോഷണം പോയത്. അഷ്റഫും കുടുംബവും മധുരയിലെ ബന്ധുവിന്‍റെ വിവാഹത്തില്‍ പങ്കെടുക്കാന്‍ പോയ സമയത്താണ് മോഷണം നടന്നത്.
ഈ മാസം 19നാണ് ഇവര്‍ വീട് പൂട്ടി മധുരയിലേക്ക് പുറപ്പെട്ടത്. വീട്ടില്‍ തിരിച്ചെത്തിയപ്പോഴാണ് മോഷണം നടന്ന വിവരം മനസിലാക്കിയത്. കിടപ്പുമുറിയിലെ ലോക്കറില്‍ സൂക്ഷിച്ചിരുന്ന സ്വര്‍ണവും പണവുമാണ് മോഷണം പോയത്. അടുക്കള ഭാഗത്തെ ജനലിന്‍റെ ഗ്രില്ല് മുറിച്ചുമാറ്റിയാണ് മോഷ്‌ടാവ് വീടിനുള്ളില്‍ കടന്നത്.