ഇടുക്കി: മുല്ലപ്പെരിയാറില്‍ പുതിയ അണക്കെട്ട് നിർമിക്കാൻ ശ്രമിക്കുന്ന കേരള സർക്കാരിനെതിരെ നാളെ കുമളിയിലേക്ക് മാർച്ച് നടത്താനൊരുങ്ങി തമിഴ്‌നാട്ടിലെ അഞ്ച് ജില്ലകളിലെ കർഷകർ. കേരളത്തിന്‍റെ നടപടി തമിഴ്‌നാട്ടിലെ കർഷകരില്‍ ആശങ്കക്കിടയാക്കിയെന്ന പേരിലാണ് പ്രതിഷേധം. പെരിയാർ വൈഗൈ ഇറിഗേഷൻ അഗ്രികള്‍ച്ചർ അസോസിയേഷന്‍റെ നേതൃത്വത്തിലാണ് സംസ്ഥാന അതിർത്തിയിലെ മുല്ലപ്പെരിയാർ ശില്‍പിയുടെ സ്‌മാരകത്തില്‍ നിന്ന് കുമളിയിലേക്ക് മാർച്ച് നടത്തുകയെന്ന് കോഓർഡിനേറ്റർ സി എച്ച്‌ അൻവർ ബാലസിങ്കം പറഞ്ഞു.
മുല്ലപ്പെരിയാറില്‍ പുതിയ അണക്കെട്ട് നിർമിക്കാൻ അനുമതി തേടി കേരള സർക്കാർ ജനുവരിയില്‍ കേന്ദ്ര വനം പരിസ്ഥിതി മന്ത്രാലയത്തിന് നിവേദനം നല്‍കിയിരുന്നു. മുല്ലപ്പെരിയാർ അണക്കെട്ട് നിർമിച്ചിട്ട് 128 വർഷമായതിനാല്‍ താഴെ താമസിക്കുന്ന മനുഷ്യരുടെയും ജീവികളുടെയും ജീവന് ഭീഷണിയുണ്ട്. നിലവിലെ അണക്കെട്ടിന്‍റെ താഴെ പുതിയത് നിർമിച്ച്‌ ജലം സംഭരിക്കാൻ അനുവദിക്കണമെന്നാണ് കേരളം ആവശ്യപ്പെട്ടിട്ടുള്ളത്.