തിരുവനന്തപുരം :ആര്യ രാജേന്ദ്രൻ - കെഎസ്ആർടിസി ഡ്രൈവർ തർക്കത്തിൽ മേയറുടെ രഹസ്യമൊഴി ഇന്ന് രേഖപ്പെടുത്തും. തർക്കം ഉണ്ടാകുന്നതിന് മുൻപ് ഡ്രൈവർ യദു അശ്ലീല ആംഗ്യം കാണിച്ചുവെന്ന് ആരോപിച്ച് ആര്യ രാജേന്ദ്രൻ പൊലീസിൽ പരാതി നൽകിയിരുന്നു. ഈ പരാതിയിലാണ് മേയറുടെ രഹസ്യമൊഴി ഇന്ന് രേഖപ്പെടുത്തുന്നത്.
ചീഫ് ജുഡീഷ്യൽ മജിസ്‌ട്രേറ്റ് കോടതിക്ക് മുൻപാകെയാണ് മേയർ ആര്യ രാജേന്ദ്രന്‍റെ മൊഴി രേഖപ്പെടുത്തുക. മേയറുടെ മൊഴി രേഖപ്പെടുത്തുന്നതിന് കന്‍റോൺമെന്‍റ് പൊലീസ് നേരത്തെ തന്നെ ചീഫ് ജുഡീഷ്യല്‍ മജിസ്‌ട്രേറ്റ് കോടതിയില്‍ അപേക്ഷ നല്‍കിയിരുന്നു. ഇത്തരത്തിൽ ലൈംഗിക അധിക്ഷേപക്കുറ്റം ചുമത്തുന്ന കേസുകളിൽ പരാതിക്കാരുടെ രഹസ്യമൊഴി രേഖപ്പെടുത്തുന്നത് സ്വാഭാവിക നടപടിക്രമമാണ്.
ഏപ്രില്‍ 27 ന് രാത്രിയായിരുന്നു വിവാദസംഭവം നടന്നത്. പാളയം സാഫല്യം കോംപ്ലക്‌സിന് മുന്നില്‍വച്ചാണ് തിരുവനന്തപുരം മേയര്‍ ആര്യ രാജേന്ദ്രനും കെഎസ്ആര്‍ടിസി ഡ്രൈവര്‍ യദുവും തമ്മില്‍ തര്‍ക്കമുണ്ടായത്. സംഭവസമയം മേയര്‍ക്കൊപ്പം ഭര്‍ത്താവും ബാലുശ്ശേരി എംഎല്‍എയുമായ സച്ചിന്‍ ദേവും ഉണ്ടായിരുന്നു.