ആലപ്പുഴ : മാവേലിക്കര മണ്ഡലത്തില്‍ യുഡിഎഫ് സ്ഥാനാര്‍ത്ഥി കൊടിക്കുന്നില്‍ സുരേഷിന് ജയം. തുടക്കത്തില്‍ എല്‍ഡിഎഫ് സ്ഥാനാര്‍ഥി സിഎ അരുണ്‍ കുമാര്‍ മുന്നേറിയെങ്കിലും കൊടിക്കുന്നില്‍ ശക്തമായി തന്നെ തിരിച്ചുവന്നു. 9501 വോട്ടുകളുടെ ഭൂരിപക്ഷത്തോടെയാണ് കൊടിക്കുന്നില്‍ സുരേഷ് വിജയം സ്വന്തമാക്കിയത്.
362,209 വോട്ടുകളാണ് കൊടിക്കുന്നില്‍ സുരേഷിന് ലഭിച്ചത്. സി എ അരുണ്‍കുമാറിന് 352708 വോട്ടുകള്‍ ലഭിച്ചപ്പോള്‍ എന്‍ഡിഎ സ്ഥാനാര്‍ഥി ബൈജു കലാശാലയ്ക്ക് 140830 വോട്ടുകള്‍ കിട്ടി. കൊല്ലം, ആലപ്പുഴ, കോട്ടയം ജില്ലകളിലെ നിയമസഭ മണ്ഡലങ്ങള്‍ ചേര്‍ന്ന് വരുന്ന മണ്ഡലമാണ് മാവേലിക്കര ലോക്‌സഭ മണ്ഡലം.
2008ലെ മണ്ഡല പുനര്‍ നിര്‍ണയത്തില്‍ അടൂര്‍ പാര്‍ലമെന്‍റ് മണ്ഡലം ഇല്ലാതാകുകയും മാവേലിക്കര എന്ന പുതിയ മണ്ഡലം രൂപീകൃതമാകുകയുമായിരുന്നു. ചങ്ങനാശേരി, കുട്ടനാട്, മാവേലിക്കര, ചെങ്ങന്നൂര്‍, കുന്നത്തൂര്‍, കൊട്ടാരക്കര, പത്തനാപുരം, നിയമസഭ മണ്ഡലങ്ങള്‍ ചേര്‍ന്നതാണ് മാവേലിക്കര ലോക്‌സഭ മണ്ഡലം. സംവരണ മണ്ഡലമായ മാവേലിക്കരയില്‍ നാലാംവട്ടം വിജയം തേടിയാണ് യുഡിഎഫിന്‍റെ കൊടിക്കുന്നില്‍ സുരേഷ് ഇക്കുറി രംഗത്ത് ഇറങ്ങിയിരിക്കുന്നത്.