തിരുവനന്തപുരം: സിപിഐക്കെതിരെ അപവാദ പ്രചരണം നടത്തിയതിന് നിലമ്പൂര്‍ എംഎല്‍എ പിവി അന്‍വറിനെതിരെ വക്കീല്‍ നോട്ടീസ്. തിരുവനന്തപുരം ആനയറ സ്വദേശിയും സിപിഐ അഭിഭാഷക സംഘടന നേതാവുമായ എസ്എസ് ബാലുവാണ് നോട്ടീസ് അയച്ചത്. അന്‍വര്‍ ആലപ്പുഴയില്‍ ഈ മാസം 14 -ന് നടത്തിയ പത്ര സമ്മേളനത്തില്‍ സിപിഐ 2011 ലും 2021 ലും ഏറനാട് സീറ്റ് മുസ്ലീം ലീഗിന് വില്‍പന നടത്തിയതായി ആരോപിച്ചിരുന്നു.
2011 ലെ വില്‍പനയ്ക്ക് അന്നത്തെ സംസ്ഥാന സെക്രട്ടറി വെളിയം ഭാര്‍ഗവന്‍ നേതൃത്വം നല്‍കി, 25 ലക്ഷം രൂപക്ക് മുസ്ലീം ലീഗിന് സീറ്റ് വിറ്റു എന്നായിരുന്നു ആരോപണം. അടിസ്ഥാനരഹിതവും വ്യാജവുമായ ഈ ആരോപണം പാര്‍ട്ടിക്കും പാര്‍ട്ടി പ്രവര്‍ത്തകര്‍ക്കും അവമതിപ്പും മാനഹാനിയും ഉണ്ടാക്കിയതായി നോട്ടീസില്‍ ആരോപിക്കുന്നു.