തിരുവനന്തപുരം:മാധ്യമ പ്രവർത്തകൻ കെ എം ബഷീറിനെ വാഹനം ഇടിച്ചു കൊലപ്പെടുത്തിയ കേസിൽ കുറ്റപത്രം വായിക്കാൻ കഴിയാതെ കേസ് പരിഗണിക്കുന്നത് മാറ്റി വച്ചു. പ്രതി ശ്രീറാം വെങ്കിട്ടരാമന് ജോലി സംബന്ധമായ ആവശ്യങ്ങൾ കാരണം എത്തിച്ചേരാൻ സാധിക്കില്ല എന്ന് അഭിഭാഷകൻ കോടതിയെ അറിയിച്ചു. ഇതേ തുടർന്നാണ് കേസ് മാറ്റിവച്ചത്. ഒന്നാം അഡീ.സെഷൻസ് കോടതിയാണ് പരിഗണിക്കുന്നത്.
കുറ്റപത്രം വായിക്കുന്നതിന് മുൻപുള്ള പ്രാഥമിക വാദം കോടതി ഇന്ന് പരിഗണിച്ചു. ഇതിനായി കോടതി കേസ് ആദ്യം വിളിച്ച ശേഷം എടുത്തു വച്ചു. അപകടം സംഭവിച്ച് അഞ്ച് വർഷം പിന്നിട്ടു. മജിസ്ട്രേട്ട് കോടതി മുതൽ സുപ്രീം കോടതി വരെ കേസ് പരിഗണിച്ചു. എന്നിട്ടും വിചാരണ നടപടികൾ ആരംഭിച്ചില്ല. ഇതിനിടയിൽ കേസിൽ രണ്ട് പ്രതികൾ എന്നത് ഒന്നായി. രണ്ടാം പ്രതി വഫ ഫിറോസിനെ കോടതി കുറ്റപത്രത്തിൽ നിന്ന് ഒഴിവാക്കി.