തിരുവനന്തപുരം: നിയമസഭാ പൊതുസമ്മേളനം നാളെ പുനരാരംഭിക്കും. ബജറ്റിന്മേലുള്ള പൊതുചര്‍ച്ചയാകും നാളെ മുതല്‍ ഫെബ്രുവരി 15 വരെ. സിപിഐ മന്ത്രിമാരുടെ ഭക്ഷ്യം, റവന്യു, മൃഗസംരക്ഷണം വകുപ്പുകള്‍ക്ക് ബജറ്റില്‍ വേണ്ടത്ര പ്രാധാന്യം നല്‍കിയില്ലെന്ന പരാതി മന്ത്രിമാര്‍ തന്നെ നേരിട്ട് ഉന്നയിച്ച സാഹചര്യത്തില്‍ പ്രതിപക്ഷം ഇത് സര്‍ക്കാരിനെതിരെ ആയുധമാക്കാന്‍ സാധ്യതയുണ്ട്.
പരസ്യ പ്രതികരണം പാടില്ലെന്ന പാര്‍ട്ടി നേതൃത്വത്തിന്‍റെ നിര്‍ദ്ദേശത്തിന്‍റെ പശ്ചാതലത്തില്‍ മന്ത്രിമാര്‍ വിമര്‍ശനമുന്നയിക്കാന്‍ സാധ്യതയില്ല. എന്നാല്‍ സിപിഐ മന്ത്രിമാരുടെ പരാതികള്‍ക്ക് പരിഹാരം കാണുന്ന പ്രഖ്യാപനങ്ങള്‍ ധനമന്ത്രിയുടെ ഭാഗത്ത് നിന്നുണ്ടാകുന്ന സാഹചര്യവും തള്ളിക്കളയാനാകില്ല. പ്രതിപക്ഷം വന്യജീവി ആക്രമണം അടിയന്തര പ്രമേയമായി അവതരിപ്പിക്കാനാണ് സാധ്യത.