എറണാകുളം : വയനാട് ദുരിതബാധിതർക്കായുള്ള ടൗൺഷിപ്പിനായി സർക്കാരിന് ഭൂമി ഏറ്റെടുക്കാമെന്ന് ഹൈക്കോടതി. ഭൂമി ഏറ്റെടുക്കൽ ഉത്തരവിനെതിരെ എസ്‌റ്റേറ്റ് ഉടമകൾ നൽകിയ ഹർജികൾ ഹൈക്കോടതി തീർപ്പാക്കി. നിയമപ്രകാരം നഷ്‌ടപരിഹാരം എസ്‌റ്റേറ്റ് ഉടമകൾക്ക് നൽകണമെന്നും കോടതി പറഞ്ഞു. ഭൂമിയിന്മേൽ ഹർജിക്കാർക്ക് ഉടമസ്ഥാവകാശം ഇല്ലെന്ന് കണ്ടെത്തിയാൽ നഷ്‌ടപരിഹാരം തിരിച്ചു പിടിക്കാമെന്നും ഉത്തരവിൽ പറഞ്ഞു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
വയനാട് ദുരിതബാധിതർക്ക് ടൗൺഷിപ്പ് നിർമിക്കാനായി 143.41 ഹെക്‌ടർ ഭൂമി ഏറ്റെടുക്കുന്നതിലെ തുടർ നടപടികളുമായി സർക്കാരിന് ഇനി മുന്നോട്ട് പോകാം. ഭൂമി ഏറ്റെടുക്കൽ നടപടികൾ റദ്ദാക്കണമെന്ന ഹാരിസൺ മലയാളം, എൽസ്റ്റൺ എസ്‌റ്റേറ്റ് തുടങ്ങിയവരുടെ ആവശ്യം ഹൈക്കോടതി തള്ളി. ഹാരിസൺ മലയാളത്തിൻ്റെ 65.41 ഹെക്‌ടർ ഭൂമിയും എൽസ്റ്റൺ എസ്റ്റേറ്റിൻ്റെ 78 ഹെക്‌ടർ ഭൂമിയുമാണ് ഏറ്റെടുക്കേണ്ടത്.