വിനോദ സഞ്ചാരികളെ വരവേല്‍ക്കുന്നത് 'മാലിന്യക്കൂമ്പാരം'; കേരള തമിഴ്‌നാട് അതിർത്തി മേഖലയില്‍ മാലിന്യ നിക്ഷേപം രൂക്ഷം - WASTE DUMPING IN IDUKKI NEDUMKANDAM

ഇടുക്കി നെടുങ്കണ്ടത്തെ കേരളാ-തമിഴ്‌നാട് അതിർത്തി മേഖലയില്‍ മാലിന്യ നിക്ഷേപം. പച്ചക്കറി വേസ്‌റ്റുകളും കീടനാശിനികളുടെ കുപ്പികളും മദ്യ കുപ്പികളും ഇവിടെ നിക്ഷേപിക്കപ്പെടുന്നു.

ഇടുക്കി: കേരള തമിഴ്‌നാട് അതിർത്തി മേഖലയില്‍ മാലിന്യ നിക്ഷേപം പതിവാകുന്നു. നെടുങ്കണ്ടം തേവാരംമെട്ട് പ്രദേശത്താണ്, പ്ലാസ്‌റ്റിക് ഉള്‍പ്പടെയുള്ള മാലിന്യങ്ങള്‍ തള്ളുന്നത്. വിനോദ സഞ്ചാരികള്‍ എത്തുന്ന മേഖലയില്‍ മദ്യകുപ്പികള്‍ പൊട്ടിച്ചിടുന്നത് അപകടങ്ങള്‍ക്കും ഇടയാക്കും.

നെടുങ്കണ്ടം, ഉടുമ്പന്‍ചോല ഗ്രാമ പഞ്ചായത്തുകള്‍ അതിര്‍ത്തി പങ്കിടുന്ന മേഖലയാണ് മാലിന്യക്കൂമ്പാരമായിരിക്കുന്നത്. ഇരു പഞ്ചായത്തുകളും സ്ഥാപിച്ച ബോര്‍ഡുകളും ഇവിടെ ഉണ്ട്. മാലിന്യം നിക്ഷേപിക്കരുതെന്ന് സൂചിപ്പിക്കുന്ന ബോര്‍ഡുകളുടെ സമീപവും മാലിന്യക്കൂമ്പാരമാണ്. പച്ചക്കറി വേസ്‌റ്റുകളും ഏലത്തിന് ഉപയോഗിക്കുന്ന കീടനാശിനികളുടെ കുപ്പികളും മദ്യ കുപ്പികളും എല്ലാം ഇവിടെ നിക്ഷേപിച്ചിട്ടുണ്ട്.

മദ്യകുപ്പികള്‍ പാറയില്‍ അടിച്ച് പൊട്ടിച്ച്, ചില്ലുകള്‍ ചിതറിച്ചിടുന്ന പതിവുമുണ്ട്. തമിഴ്‌നാട്ടിലെ കാര്‍ഷിക ഗ്രാമങ്ങളുടെ കാഴ്‌ചകള്‍ അടക്കം ലഭിക്കുന്ന തേവാരംമെട്ടില്‍ എത്തുന്ന സഞ്ചാരികള്‍ക്കും മാലിന്യ കൂമ്പാരം ബുദ്ധിമുട്ട് സൃഷ്‌ടിക്കുകയാണ്. മാലിന്യ നിക്ഷേപകരെ കണ്ടെത്തുന്നതിന് സിസിടിവി സ്ഥാപിക്കണമെന്ന് മുന്‍പ് നാട്ടുകാര്‍ ആവശ്യപ്പെട്ടിരുന്നു. എന്നാല്‍, ബോര്‍ഡ് സ്ഥാപിച്ചതല്ലാതെ മറ്റ് നടപടികള്‍ ഒന്നും തന്നെ ഉണ്ടായിട്ടില്ല.