കോഴിക്കോട്:കുന്ദമംഗലത്ത് അനാഥയായ സ്ത്രീയെ ഫ്ലാറ്റിൽ എത്തിച്ച് പീഡിപ്പിക്കുകയും മുഖത്തു ചൂടുവെള്ളം ഒഴിച്ചതിനുശേഷം മർദ്ദിക്കുകയും ചെയ്‌ത കേസിലെ പ്രതികളെ കുന്ദമംഗലം പൊലീസ് പിടികൂടി. രണ്ട് വർഷത്തിന് ശേഷമാണ് പ്രതികൾ പിടിയിലാകുന്നത്. മലപ്പുറം കൊണ്ടോട്ടി പാറയിൽ വീട്ടിൽ പി മുഹമ്മദ് ഷാഫി (30), പട്ടാമ്പി പരദൂർ മാർക്കശ്ശേരി വീട്ടിൽ മുഹമ്മദ് ഷെബീൽ (28), മലപ്പുറം കൊണ്ടോട്ടി വല്ലിയിൽ വീട്ടിൽ മുഹമ്മദ് ഫൈസൽ (28) എന്നിവരാണ് പിടിയിലായത്.
2022 ജൂണിലാണ് ഫോൺ വഴി പരിചയപ്പെട്ട അനാഥയായ സ്ത്രീയെ കുന്ദമംഗലത്തെ ഫ്ലാറ്റിൽ എത്തിച്ച് യുവാക്കൾ പീഡിപ്പിക്കുകയും മർദ്ദിക്കുകയും ചെയ്‌തത്. സംഭവത്തിന് ശേഷം ഒന്നര വർഷമായി അബോധാവസ്ഥയിലായിരുന്ന സ്ത്രീ സാധാരണ നിലയിലേക്കെത്തിയതിന് ശേഷം കുന്ദമംഗലം പൊലീസില്‍ പരാതി നല്‍കുകയായിരുന്നു. ഇൻസ്പെക്‌ടർ എസ് ശ്രീകുമാർ ഇരയുടെ മൊഴി രേഖപ്പെടുത്തിയതിനെത്തുടർന്നാണ് പ്രതികളിലേക്ക് അന്വേഷണം എത്തിയത്.