ഡ്രൈവിംഗ് ടെസ്റ്റ് പരിഷ്‌കാരം : കരിദിനം ആചരിച്ച് ഉടമകള്‍ - Driving test new reforms

ഡ്രൈവിംഗ് ടെസ്റ്റ് പരിഷ്കരണത്തില്‍ പ്രതിഷേധിച്ച് കരിദിനം ആചരിച്ച് ഡ്രൈവിംഗ് സ്‌കൂള്‍ ഉടമകള്‍. കരിദിനം ആചരിക്കുന്നത് ചേവായൂര്‍ വാഹന പരിശോധന കേന്ദ്രത്തിന് കീഴിലുള്ള എഴുപതോളം സ്‌കൂളുകളുടെ ഉടമകള്‍.

കോഴിക്കോട് :ഡ്രൈവിംഗ് ടെസ്റ്റ് പരിഷ്‌കാരത്തില്‍ കരിദിനം ആചരിച്ച് പ്രതിഷേധിച്ച് ഡ്രൈവിംഗ് സ്‌കൂൾ ഉടമകളുടെ സംഘടനകൾ. ചേവായൂർ വാഹന പരിശോധന കേന്ദ്രത്തിന് കീഴിലെ എഴുപതോളം ഡ്രൈവിംഗ് സ്‌കൂളുകളുടെ ഉടമകളാണ് കരിദിനം ആചരിച്ച് പുതിയ പരിഷ്‌കാരത്തെ എതിർക്കുന്നത്. പുതിയ പരിഷ്‌കാരം പരിചയപ്പെടുത്തുന്നതിന് മുൻപ് തന്നെ പ്രാബല്യത്തിൽ വരിക എന്നത് വലിയ വെല്ലുവിളിയാണെന്നും
ഈ സംവിധാനത്തെ കുറിച്ച് യാതൊരുവിധ അറിവും ഇല്ലാത്തവരെ ടെസ്റ്റിലേക്ക് എത്തിക്കുക എന്നത് ശരിയല്ലെന്നും ഡ്രൈവിംഗ് സ്‌കൂൾ ഉടമകൾ പറഞ്ഞു.

ടെസ്റ്റ് നടത്താൻ ആവശ്യമായ യാതൊരുവിധ സംവിധാനങ്ങളും ഒരുക്കാതെയാണ് ഇപ്പോൾ പുതിയ പരിഷ്‌കാരം നടപ്പാക്കുന്നത്. അതുകൊണ്ടുതന്നെ ആവശ്യമായ യാതൊരുവിധ പരിശീലനവും പുതിയ സംവിധാനത്തിലൂടെ ഡ്രൈവിംഗ് പരിശീലനത്തിന് എത്തുന്നവർക്ക് നൽകാൻ ആയിട്ടില്ലെന്നും ഡ്രൈവിംഗ് സ്‌കൂൾ ഉടമകൾ സൂചിപ്പിച്ചു.

ആവശ്യമായ ഒരുക്കങ്ങളും ക്രമീകരണങ്ങളും ഏർപ്പെടുത്താത്ത പക്ഷം ഇനിയും ഈ പരിഷ്‌കാരത്തിനെതിരെ ശക്തമായ പ്രതിഷേധ സമരങ്ങളുമായി മുന്നോട്ടുപോകുമെന്നും ഡ്രൈവിംഗ് സ്‌കൂൾ ഉടമകൾ മുന്നറിയിപ്പ് നൽകി. രാവിലെ മുതൽ നിരവധി പേരാണ് കോഴിക്കോട് ചേവായൂരിലെ ഡ്രൈവിംഗ് ടെസ്റ്റ് ഗ്രൗണ്ടിൽ എത്തിച്ചേർന്നത്. കരിദിനത്തോട് അനുബന്ധിച്ച് ചേവായൂരിലെ ടെസ്റ്റ് ഗ്രൗണ്ടിൽ പ്രതിഷേധ പ്രകടനവും നടന്നു.