നാട്ടുകാർക്കൊരു വള്ളിക്കെട്ടായി വനംവകുപ്പിൻ്റെ കുട്ടി വനം പദ്ധതി: പരാതിയുമായി പ്രദേശവാസികൾ

കുട്ടി വനത്തോട് ചേർന്നൊഴുകുന്ന തോട്ടിലേക്ക് വന്‍മരങ്ങള്‍ കടപുഴകി വീണ് ഒഴുക്ക് തടസപ്പെടുന്നു. പിന്നീട് വെള്ളം കെട്ടിക്കിടന്ന് ദുര്‍ഗന്ധം ഉണ്ടാകുകയും അത് പരിസരവാസികൾക്ക് ബുദ്ധിമുട്ടുണ്ടാക്കുന്നുവെന്നാണ് പരാതി.

പത്തനംതിട്ട:നാട്ടുകാർക്കൊരു വള്ളിക്കെട്ടായി ടൗണിന് സമീപത്തെ വനംവകുപ്പിൻ്റെ കുട്ടി വനം. പത്തനംതിട്ട റാന്നിയിൽ ടൗണിനോട് ചേർന്ന് വനംവകുപ്പിൻ്റെ കൈവശമുള്ള മൂന്ന് ഏക്കർ സ്ഥലത്തെ കുട്ടി വനം പദ്ധതിയാണ് നാട്ടുകാർക്ക് വിനയാകുന്നത്.കുട്ടി വനത്തോട് ചേർന്ന വൻമരങ്ങൾ കടപുഴകി വീണ് തോട്ടിലെ നീരൊഴുക്ക് തടസപ്പെടുകയും മാലിന്യം അടിഞ്ഞ് കൂടി ദുർഗന്ധം പ്രദേശവാസികളുടെ ജീവിതം ദുസഹമാക്കുകയും ചെയ്യുന്നതായാണ് നാട്ടുകാരുടെ പരാതി.

ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക

മലിനജലം കെട്ടിനിൽക്കുന്നത് പകർച്ചവ്യാധി ഭീഷണിയും ഉയർത്തുന്നുണ്ട്. നാട്ടുകാർ നിരവധി തവണ വനം വകുപ്പ് അധികൃതർക്ക് പരാതിനൽകിയെങ്കിലും യാതൊരു ഫലവും ഉണ്ടായിട്ടില്ല. പമ്പാനദിയിലേക്ക് ഒഴുകിയെത്തുന്ന വലിയതോടിൻ്റെ ഓരം ചേർന്നാണ് തേക്ക്, ആഞ്ഞിലി തുടങ്ങിയ വൻമരങ്ങൾ ഇടതൂർന്ന് വളർന്ന് നിൽക്കുന്ന കുട്ടിവനം സ്ഥിതി ചെയ്യുന്നത്.

മൂന്നേക്കർ സ്ഥലം ഉണ്ടെന്നാണ് വനം വകുപ്പിൻ്റെ കണക്ക്. എന്നാൽ തോടിൻ്റെ സംരക്ഷണഭിത്തി ഇടിഞ്ഞ് ഭൂമിയുടെ വിസ്‌തൃതി കുറയുകയും വൻ മരങ്ങൾ വീണ് തോടിൻ്റെ ഗതി മാറി ഒഴുകുകയും ചെയ്യുന്ന അവസ്ഥയാണ് നിലവിലുള്ളത്. തോടിൻ്റെ ഇരുകരകളിലും താമസിക്കുന്ന നിരവധി കുടുംബങ്ങൾക്കും തൊട്ടടുത്ത ദേവസ്വം ബോർഡിൻ്റെ ഉടമസ്‌ഥതയിലുള്ള ശാസ്‌താ ക്ഷേത്രത്തിനും തോട് ഗതിമാറി ഒഴുകുന്നത് ഭീഷണി ഉയർത്തുന്നുണ്ട്.

ലക്ഷങ്ങൾ വിലമതിക്കുന്ന തേക്ക് തടികൾ ഉൾപ്പടെയുള്ളവ വർഷങ്ങളായി തോട്ടിലെ മണ്ണിൽ പുതഞ്ഞ് കിടപ്പുണ്ട്. ശേഷിക്കുന്ന ഭൂമിയെങ്കിലും സംരക്ഷണഭിത്തി കെട്ടി സംരക്ഷിക്കാൻ വനം വകുപ്പ് തയ്യാറാവണമെന്നും വലിയ തോട് പൂർവസ്ഥിതിയിലാക്കണമെന്നുമാണ് നാട്ടുകാരുടെ ആവശ്യം.