കണ്ണൂർ:എഡിഎമ്മിൻ്റെ മരണത്തിൽ ആത്മഹത്യാപ്രേരണ കുറ്റം ചുമത്തപ്പെട്ട് ജയിലിൽ കഴിഞ്ഞ് ജില്ലാ പഞ്ചായത്ത് മുന്‍ പ്രസിഡന്‍റ് പിപി ദിവ്യ 11ാം ദിവസം പുറത്തിറങ്ങുമ്പോൾ പാർട്ടിയിൽ ക്ലീൻ ബൗൾഡ് ആണ്. കഴിഞ്ഞ ദിവസം രാത്രിയാണ് ദിവ്യയെ തെരഞ്ഞെടുക്കപ്പെട്ട എല്ലാം സ്ഥാനങ്ങളിൽ നിന്നും സിപിഎം നീക്കിയത്. എങ്കിലും പാർട്ടി കേഡർ എന്ന നിലയിൽ സിപിഎം പൂർണമായും ദിവ്യയെ തള്ളാൻ ഇടയില്ല.
ജാമ്യാപേക്ഷയിൽ പോലും ശക്തമായ വാദ പ്രതിവാദം ആണ് നടന്നത്. തലശേരി ജില്ലാ കോടതിയാണ് കേസിൽ വിധി പറഞ്ഞത്. ദിവ്യയുടെയും പ്രോസിക്യൂഷൻ്റെയും എഡിഎമ്മിൻ്റെ കുടുംബത്തിൻ്റെയും വാദം കേട്ട ശേഷം കേസ് വിധിപറയാനായി മാറ്റുകയായിരുന്നു. എഡിഎം കൈക്കൂലി വാങ്ങിയെന്ന വാദത്തിലുറച്ചാണ് ദിവ്യയുടെ അഭിഭാഷകൻ വാദം മുന്നോട്ട് കൊണ്ടുപോയത്.
കൈക്കൂലി നൽകിയതിനാണ് പ്രശാന്തനെ ജോലിയിൽ നിന്ന് സസ്പെന്‍ഡ് ചെയ്‌തതെന്നും എഡിഎം പ്രശാന്തിനെ ഫോണിൽ വിളിച്ച് സംസാരിച്ചുവെന്നും ഇരുവരും തമ്മിൽ കണ്ടുവെന്നും ഇതിൻ്റെ ദൃശ്യങ്ങൾ കെടിഡിസിയുടെ ഹോട്ടലിൽ നിന്ന് ശേഖരിക്കണമെന്നും ദിവ്യയുടെ അഭിഭാഷകൻ കോടതിയിൽ ആവശ്യപ്പെട്ടിരുന്നു.
അഞ്ചാം തീയതി പ്രശാന്ത് സഹകരണ ബാങ്കിൽ നിന്ന് ഒരു ലക്ഷം രൂപ സ്വർണ വായ്‌പയെടുത്തതും ആറാം തീയതി എഡിഎമ്മും പ്രശാന്തും ഒരേ ടവർ ലൊക്കേഷനിൽ ഉണ്ടായതും സാഹചര്യ തെളിവായി പരിഗണിച്ച് ജാമ്യം അനുവദിക്കണമെന്നാണ് ദിവ്യയുടെ അഭിഭാഷകൻ അഡ്വ.കെ.വിശ്വൻ കോടതിയിൽ വാദിച്ചത്. ജാമ്യം കിട്ടിയ ശേഷവും കൂടുതൽ കാര്യം പുറത്തു വരാൻ ഉണ്ടെന്നാണ് വിശ്വൻ മാധ്യമങ്ങളോട് പ്രതികരിച്ചത്.
എന്നാൽ എഡിഎമ്മിൻ്റെ മരണത്തിൽ ദിവ്യയെ അറസ്റ്റ് ചെയ്യാതെ പൊലീസ് ഒളിച്ചുകളിച്ചെന്ന് മരിച്ച നവീൻ ബാബുവിൻ്റെ കുടുംബം വാദിക്കുകയായിരുന്നു. എഡിഎമ്മിൻ്റെ ഭാര്യയുടെ മൊഴി പൊലീസ് രേഖപ്പെടുത്തിയില്ലെന്നും രണ്ട് തവണ നോട്ടിസ് നൽകിയിട്ടും ദിവ്യ അന്വേഷണത്തോട് സഹകരിച്ചില്ലെന്നും കോടതിയിൽ വ്യക്തമാക്കി.