കോഴിക്കോട്: പതിനൊന്ന് വർഷം മുമ്പ് സ്‌കൂളിൽ മോഷണം നടത്തിയ പ്രതി പിടിയിൽ. ഫറോക്ക് മണ്ണൂർ സ്വദേശി സുബീഷാണ് (32) അറസ്‌റ്റിലായത്. നല്ലളം ചെറുവണ്ണൂർ സ്‌കൂളിൻ്റെ ഓഫിസ് മുറിയുടെ പൂട്ട് തകർത്ത് ലാപ്ടോപ്പ്, ക്യാമറ എന്നിവയാണ് സുബീഷ് മോഷ്‌ടിച്ചത്. മോഷണം നടത്തിയ ശേഷം നാളിതുവരെ ഒളിവിൽ കഴിയുകയായിരുന്നു.
പ്രതി കഴിഞ്ഞ ദിവസം മണ്ണൂരിലുള്ള വീട്ടിലെത്തിയെന്ന രഹസ്യവിവരത്തിൻ്റെ അടിസ്ഥാനത്തിൽ നടത്തിയ പരിശോധനയിലാണ് പിടിയിലായത്. മോഷണം നടന്ന സ്ഥലത്ത് നിന്നും പൊലീസ് ശേഖരിച്ച വിരലടയാള രേഖകൾ പരിശോധിച്ചാണ് പ്രതിയെക്കുറിച്ച് സൂചന ലഭിച്ചത്. പ്രതി നേരത്തെ ഫറോക്ക് പൊലീസ് സ്‌റ്റേഷനിൽ രജിസ്‌റ്റർ ചെയ്‌ത കവർച്ചാ കേസിലും പ്രതിയാണ്.