കോഴിക്കോട്: ചാത്തമംഗലം എൻഐടിയിലെ ജീവനക്കാരിയുടെ സ്‌കൂട്ടർ മോഷ്‌ടിച്ച പ്രതി പിടിയിൽ. പെരിങ്ങൊളം അറപ്പൊയിൽ എ പി മുജീബി (38) നെയാണ് കുന്ദമംഗലം പൊലീസ് പിടികൂടിയത്. ഏപ്രിൽ മൂന്നാം തീയതിയാണ് കേസിനാസ്‌പദമായ സംഭവം ഉണ്ടായത്.
എൻഐടി ക്യാമ്പസിന്‍റെ പുറത്ത് വാഹനങ്ങൾ പാർക്ക് ചെയ്യുന്ന ഫുട്‌പാത്തിന് സമീപം നിർത്തിയിട്ടതായിരുന്നു സ്‌കൂട്ടർ. ജോലി കഴിഞ്ഞ് സ്‌കൂട്ടർ എടുക്കാൻ വന്നപ്പോഴാണ് വാഹനം കാണാതായ വിവരം ഇവർ അറിയുന്നത്. തുടർന്ന് കുന്ദമംഗലം പൊലീസിൽ പരാതി നൽകി.
പരാതിയുടെ അടിസ്ഥാനത്തിൽ പൊലീസ് ഈ ഭാഗത്തെ സിസിടിവികൾ കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയെ കുറിച്ചുള്ള സൂചന ലഭിച്ചത്. അന്വേഷണത്തിനിടെ രാമനാട്ടുകരക്കു സമീപം പുളിക്കലെ വാടക വീട്ടിൽ വെച്ച് പ്രതിയെ പിടികൂടുകയായിരുന്നു.വീട് പരിശോധിച്ചതിൽ നിന്ന് മോഷണത്തിന് വേണ്ടി ഉപയോഗിക്കുന്ന ഗ്യാസ് കട്ടർ ഉൾപ്പെടെയുള്ള ഉപകരണങ്ങളും പൊലീസ് പിടിച്ചെടുത്തു.