ഇടുക്കി: മെഡിക്കല്‍ കോളജിന്‍റെ വികസന പ്രവര്‍ത്തനങ്ങള്‍ക്കായി 2018 ൽ അനുവദിച്ച 40 ഏക്കർ സ്ഥലത്തിന് പുറമെ 50 ഏക്കർ കൂടി അനുവദിച്ച് സർക്കാർ ഉത്തരവിറക്കി. ഇടുക്കി താലൂക്കില്‍ ഇടുക്കി വില്ലേജിൽ സര്‍വ്വെ നമ്പര്‍ 161/1 ല്‍ ഉൾപ്പെടുന്ന ഭൂമിയുടെ ഉപയോഗവും കൈവശാനുഭവുമാണ് ഭൂമി കൈമാറ്റ വൃവസ്ഥ പ്രകാരം ആരോഗ്യ കുടുംബ ക്ഷേമ വകുപ്പിന് (മെഡിക്കല്‍ വിദ്യാഭ്യാസ വകുപ്പിന്) കൈമാറിയിട്ടുള്ളത്.
ലാൻഡ് റവന്യു കമ്മീഷണർ മുഖേന ജില്ലാ കലക്‌ടർ സർക്കാരിന് നൽകിയ പ്രൊപോസലിനെ തുടർന്നാണ് നടപടി. നിബന്ധനകള്‍ക്ക് വിധേയമായിട്ടാണ് ഭൂമി കൈമാറിയിട്ടുള്ളത്. അനുവദിച്ച ആവശ്യത്തിന്‌ മാത്രമേ ഉപയോഗിക്കാൻ പാടുള്ളൂ. ഏതെങ്കിലും ധനകാര്യ സ്ഥാപനങ്ങളില്‍ പണയപ്പെടുത്തുവാനോ അന്യാധീനപ്പെടുത്തുവാനോ പാടില്ല. പാട്ടം, ഉപ പാട്ടം, തറവാടകയ്ക്ക്‌ നല്‍കുക, അന്യാധീനപ്പെടുത്തുക എന്നിവ പാടില്ല.