പൂനെ:ലോക ടെസ്റ്റ് ചാമ്പ്യൻഷിപ്പില്‍ ഏറ്റവും കൂടുതല്‍ വിക്കറ്റ് നേടിയ താരങ്ങളുടെ പട്ടികയുടെ തലപ്പത്തേക്ക് ഇന്ത്യൻ ഓഫ്‌ സ്പിന്നര്‍ രവിചന്ദ്രൻ അശ്വിൻ. പൂനെയില്‍ പുരോഗമിക്കുന്ന ന്യൂസിലൻഡിനെതിരായ രണ്ടാം ടെസ്റ്റിലാണ് അശ്വിന്‍റെ നേട്ടം. മത്സരത്തിന്‍റെ ആദ്യ സെഷനില്‍ രണ്ട് പേരെ പുറത്താക്കിയതോടെ ടെസ്റ്റ് ചാമ്പ്യൻഷിപ്പിലെ വിക്കറ്റ് വേട്ടക്കാരുടെ പട്ടികയില്‍ ഓസീസ് താരം നാഥൻ ലിയോണെ മറികടന്നാണ് അശ്വിൻ ഒന്നാം സ്ഥാനത്തേക്ക് എത്തിയത്.
ടെസ്റ്റ് ചാമ്പ്യൻഷിപ്പ് ആരംഭിച്ച 2019 മുതല്‍ ഇതുവരെയുള്ള കാലയളവില്‍ കളിച്ച 39 മത്സരങ്ങളില്‍ നിന്നും 188 വിക്കറ്റാണ് അശ്വിൻ സ്വന്തമാക്കിയിട്ടുള്ളത്. 20.71 ആണ് ഇക്കാലയളവില്‍ താരത്തിന്‍റെ ബൗളിങ് ശരാശരി. 47 മത്സരം കളിച്ച നാഥൻ ലിയോണ്‍ 26.70 ശരാശരിയില്‍ 187 വിക്കറ്റാണ് ഇതുവരെ ടെസ്റ്റ് ചാമ്പ്യൻഷിപ്പില്‍ നേടിയിട്ടുള്ളത്. ഓസ്‌ട്രേലിയൻ നായകൻ പാറ്റ് കമ്മിൻസ് (175), മിച്ചല്‍ സ്റ്റാര്‍ക്ക് (175), ഇംഗ്ലണ്ട് മുൻ പേസര്‍ സ്റ്റുവര്‍ട്ട് ബ്രോഡ് (147) എന്നിവരാണ് പട്ടികയില്‍ ആദ്യ അഞ്ചിലെ മറ്റ് താരങ്ങള്‍.