പാരീസ്: അമ്പെയ്ത്തില്‍ ഇന്ത്യയ്ക്ക് മെഡല്‍ പ്രതീക്ഷയായി മിക്‌സഡ് ടീം ഇനത്തില്‍ അങ്കിത ഭഗത്-ധീരജ് ബൊമ്മദേവര സഖ്യം ക്വാര്‍ട്ടര്‍ ഫെെനലിലേക്ക് യോഗ്യത നേടി. ഇന്തോനേഷ്യൻ ടീമിനെ 5-1 ന് പരാജയപ്പെടുത്തിയാണ് ഇന്ത്യന്‍ ടീം ക്വാര്‍ട്ടറില്‍ ഇടം പിടിച്ചത്. ഇന്ന് (ഓഗസ്റ്റ് 2) ക്വാര്‍ട്ടര്‍ ഫെെനല്‍ മത്സരങ്ങള്‍ നടക്കും. ക്വാര്‍ട്ടറില്‍ സ്‌പെയിനാണ് ഇന്ത്യയുടെ എതിരാളി.
ഇന്തോനേഷ്യന്‍ സഖ്യമായ ദിയാനന്ദ ചൊയ്‌റുനിസ-ആരിഫ് പാംഗെസ്തുവിന്‍റെ വെല്ലുവിളി മറികടക്കാന്‍ ധീരജ്- അങ്കിത സഖ്യം മികച്ച കളിയാണ് പുറത്തെടുത്തത്. ആദ്യസെറ്റില്‍ ഇന്ത്യ 37 പോയിന്‍റ് നേടിയപ്പോള്‍ ഇന്തോനേഷ്യന്‍ സഖ്യത്തിന് 36 പോയിന്‍റ് നേടാന്‍ കഴിഞ്ഞു.