ലണ്ടൻ :കരബാവോ കപ്പില്‍ (Carabao Cup 2024) മുത്തമിട്ട് ലിവര്‍പൂള്‍ (Liverpool). വെംബ്ലിയില്‍ നടന്ന ഫൈനലില്‍ ചെല്‍സിയെ (Chelsea) എതിരില്ലാത്ത ഒരു ഗോളിനാണ് ചെമ്പട തകര്‍ത്തത്. എക്‌സ്‌ട്രാ ടൈമിലേക്ക് നീണ്ട മത്സരത്തില്‍ 118-ാം മിനിറ്റില്‍ വാൻ ഡൈക്കാണ് ലിവര്‍പൂളിനായി ഗോള്‍ നേടിയത് (Liverpool vs Chelsea EFL Cup Final Result).
പരിക്കിന്‍റെ പിടിയിലുള്ള പ്രമുഖ താരങ്ങള്‍ കലാശപ്പോരാട്ടത്തില്‍ നിന്നും വിട്ടുനിന്നപ്പോള്‍ യുവനിരയെ കളത്തിലിറക്കിയാണ് ലിവര്‍പൂള്‍ കളിച്ചത്. കളിയിലുടനീളം നിരവധി അവസരങ്ങള്‍ സൃഷ്‌ടിച്ചെടുക്കാൻ രണ്ട് ടീമിനുമായി. എന്നാല്‍, ഗോള്‍ കീപ്പര്‍മാരുടെ തകര്‍പ്പൻ ഫോം വെംബ്ലിയിലെ മത്സരം ആവേശത്തിലാക്കി.