ന്യൂഡല്‍ഹി:2024ലെ ദേശീയ കായിക പുരസ്‌കാരങ്ങള്‍ പ്രഖ്യാപിച്ചു. ലോക ചെസ് ചാമ്പ്യൻ ഡി ഗുകേഷ്, ഇന്ത്യൻ ഹോക്കി ടീം ക്യാപ്‌റ്റൻ ഹര്‍മൻപ്രീത് സിങ്, ഒളിമ്പിക്സ് ഇരട്ടമെഡല്‍ ജേതാവ് മനു ഭാക്കര്‍, പാര അത്‌ലറ്റ് പ്രവീണ്‍ കുമാര്‍ എന്നിവര്‍ ഇക്കുറി പരമോന്നത കായിക ബഹുമതിയായ മേജര്‍ ധ്യാൻ ചന്ദ് ഖേല്‍ രത്ന പുരസ്‌കാരത്തിന് അര്‍ഹരായി. ദേശീയ യുവജനകാര്യ, കായിക മന്ത്രാലയമാണ് പുരസ്‌കാരങ്ങള്‍ പ്രഖ്യാപിച്ചത്. ഈ മാസം 17ന് രാഷ്‌ട്രപതി ഭവനില്‍ സംഘടിപ്പിക്കുന്ന പ്രത്യേക ചടങ്ങില്‍ രാഷ്‌ട്രപതി ദ്രൗപതി മുര്‍മു പുരസ്‌കാരങ്ങള്‍ വിതരണം ചെയ്യും.
17 പാര അത്‌ലറ്റുകള്‍ ഉള്‍പ്പടെ 32 പേര് അര്‍ജുന അവാര്‍ഡിനും അര്‍ഹരായി. മലയാളി നീന്തല്‍ താരം സജൻ പ്രകാശും അര്‍ജുന അവര്‍ഡിന് അര്‍ഹനായി. 2017ലെ ഏഷ്യൻ ഇൻഡോര്‍ ഗെയിംസില്‍ 100 മീറ്റര്‍ ബട്ടര്‍ഫ്ലൈസില്‍ വെള്ളി മെഡലാണ് സജൻ നേടിയത്. ഗുവാഹത്തിയിൽ 2016ൽ നടന്ന ഏഷ്യൻ ഗെയിംസിൽ 200 മീറ്റർ ബട്ടർഫ്ലൈ, 1500 മീറ്റർ ഫ്രീസ്റ്റൈൽ, 4x200 മീറ്റർ ഫ്രീസ്റ്റൈൽ റിലേ ഇനങ്ങളിൽ സ്വര്‍ണ മെഡലും മലയാളി താരം നേടിയിട്ടുണ്ട്.
വിവാദങ്ങള്‍ക്കിടെയാണ് ഇക്കുറി ദേശീയ കായിക പുരസ്‌കാരങ്ങള്‍ പ്രഖ്യാപിച്ചിരിക്കുന്നത്. പരമോന്നത കായിക ബഹുമതിയായ ഖേല്‍ രത്ന പുരസ്‌കാരത്തിന് അര്‍ഹരായ താരങ്ങളുടെ പേര് നേരത്തെ തന്നെ കായിക മന്ത്രാലയം പ്രഖ്യാപിച്ചിരുന്നു. ആദ്യം പുറത്തുവിട്ട പട്ടികയില്‍ ഒളിമ്പിക്സ് മെഡല്‍ ജേതാവ് മനു ഭാക്കറുടെ പേരുണ്ടായിരുന്നില്ല. 12 അംഗ സെലക്ഷൻ കമ്മിറ്റി ശിപാര്‍ശ ചെയ്‌ത പട്ടികയിലായിരുന്നു മനു ഭാക്കറിന്‍റെ പേരില്ലാതിരുന്നത്.
പാരിസ് ഒളിമ്പിക്‌സില്‍ ഷൂട്ടിങ്ങില്‍ ഇന്ത്യയ്‌ക്ക് വേണ്ടി രണ്ട് മെഡല്‍ നേടിയ മനു ഭാക്കര്‍ പുരസ്‌കാരത്തിനായി അപേക്ഷ നല്‍കിയിട്ടില്ലെന്നായിരുന്നു കായിക മന്ത്രാലയം ആദ്യം അറിയിച്ചത്. എന്നാല്‍, തങ്ങള്‍ പുരസ്‌കാരത്തിന് അപേക്ഷ നല്‍കിയിരുന്നുവെന്നായിരുന്നു താരത്തിന്‍റെ കുടുംബം വ്യക്തമാക്കിയത്. ഇത് വിവാദമായ പശ്ചാത്തലത്തിലാണ് പുതിയ പട്ടികയില്‍ ചെസ് ലോക ചാമ്പ്യൻ ഡി ഗുകേഷിനൊപ്പം മനു ഭാക്കറിന്‍റെയും പേര് കായിക മന്ത്രാലയം ഉള്‍പ്പെടുത്തിയത്.
പാരിസ് ഒളിമ്പിക്‌സില്‍ ഇന്ത്യയ്‌ക്കായി ചരിത്ര നേട്ടമായിരുന്നു മനു ഭാക്കര്‍ സ്വന്തമാക്കിയത്. 10 മീറ്റര്‍ എയര്‍ പിസ്റ്റള്‍, 10 മീറ്റര്‍ എയര്‍ പിസ്റ്റള്‍ മിക്‌സഡ് വിഭാഗം എന്നിവയില്‍ താരത്തിന് വെങ്കല മെഡല്‍ നേടാനായി. ഒളിമ്പിക്സ് ഷൂട്ടിങ്ങില്‍ മെഡല്‍ നേടുന്ന ആദ്യ ഇന്ത്യൻ വനിതാ താരമായും മനു ഭാക്കര്‍ മാറിയത്.
22കാരിയായ മനു ഭാക്കര്‍ 2018 കോമണ്‍വെല്‍ത്ത് ഗെയിംസിലും ഷൂട്ടിങ് ലോകകപ്പിലും സ്വര്‍ണം സ്വന്തമാക്കിയിട്ടുണ്ട്. ഷൂട്ടിങ് സ്‌പോര്‍ട്ട് ഫെഡറേഷൻ സംഘടിപ്പിച്ച 2018ലെ ഷൂട്ടിങ് ലോകകപ്പില്‍ സ്വര്‍ണം നേടിയതോടെ ഈ നേട്ടം സ്വന്തമാക്കുന്ന പ്രായം കുറഞ്ഞ താരമായും മനു ഭാക്കര്‍ മാറിയിരുന്നു. 2020ല്‍ അര്‍ജുന അവാര്‍ഡിനും മനു ഭാക്കര്‍ അര്‍ഹയായിട്ടുണ്ട്.