ന്യൂഡൽഹി :2024 ലെ ടി 20 ലോകകപ്പ് വിജയിച്ച ഇന്ത്യൻ ടീമിന് 125 കോടി രൂപ പാരിതോഷികം പ്രഖ്യാപിച്ച് ബിസിസിഐ സെക്രട്ടറി ജയ് ഷാ. രോഹിത് ശർമ്മ നയിച്ച ടീം ലോകകപ്പ് നേടിയതിന് 125 കോടി രൂപ സമ്മാനത്തുക പ്രഖ്യാപിക്കുന്നതിൽ സന്തോഷമുണ്ട് എന്ന് അദ്ദേഹം പറഞ്ഞു. ടൂർണമെന്‍റിലുടനീളം ഇന്ത്യൻ ടീം അസാധാരണമായ കഴിവും നിശ്ചയദാർഢ്യവും കായികക്ഷമതയും പ്രകടിപ്പിച്ചു. ഈ മികച്ച നേട്ടത്തിന് എല്ലാ കളിക്കാർക്കും പരിശീലകർക്കും സപ്പോർട്ട് സ്‌റ്റാഫിനും അഭിനന്ദനങ്ങൾ നേരുന്നുവെന്നും അദ്ദേഹംഎക്‌സിൽ കുറിച്ചു.
'രോഹിത് ശർമ്മയും ടീമും ടൂർണമെന്‍റിലുടനീളം ഒരു കളി പോലും തോൽക്കാതെ ടി20 ലോകകപ്പ് നേടുന്ന ആദ്യ ടീമായി ചരിത്രം സൃഷ്‌ടിച്ചു. ടീം ശ്രദ്ധേയമായ ദൃഢതയും പ്രതിരോധവും പ്രകടിപ്പിച്ചു, ഐസിസി ടി20 ലോകകപ്പിന്‍റെ ചരിത്രത്തിൽ തോൽവിയറിയാതെ ടൂർണമെന്‍റ് വിജയിക്കുന്ന ആദ്യ ടീമായി ഇന്ത്യ മാറി.' എന്നും അദ്ദേഹം കൂട്ടിചേർത്തു.