രാജ്‌ഗിര്‍: വനിതാ ഏഷ്യൻ ചാമ്പ്യൻസ് ട്രോഫി ഹോക്കി ടൂർണമെന്‍റില്‍ മൂന്നാം തവണയും ഇന്ത്യ കിരീടം ചൂടി. ഫൈനല്‍ പോരാട്ടത്തില്‍ ചൈനയെ ഒരു ഗോളിന് തോൽപ്പിച്ചാണ് ആതിഥേയരായ ഇന്ത്യ കപ്പ് സ്വന്തമാക്കിയത്. മൂന്നാം ക്വാര്‍ട്ടറില്‍ പെനാൽറ്റി കോർണർ ലക്ഷ്യത്തിലെത്തിച്ച് ഒരു ബാക്ക്‌ഹാൻഡ് ഷോട്ടിലൂടെ ദീപികയാണ് വിജയഗോൾ നേടിയത്.
ഏതാനും മിനിറ്റുകൾക്ക് ശേഷം ദീപികയ്ക്ക് പെനാൽറ്റി സ്ട്രോക്ക് നഷ്ടമായെങ്കിലും ഇന്ത്യ മത്സരത്തിൽ ലീഡ് നിലനിർത്തുകയും വിജയം ഉറപ്പിക്കുകയുമായിരുന്നു. ദീപിക ടൂർണമെന്‍റിൽ ഏറ്റവും കൂടുതൽ ഗോളുകൾ (11) നേടിയ താരമായി മാറി.മൂന്നാം കിരീടം നേടിയതോടെ ടൂർണമെന്‍റില്‍ ഏറ്റവും കൂടുതൽ ജേതാക്കളായ കൊറിയക്കൊപ്പം ഇന്ത്യയെത്തി. മുന്‍പ് 2016, 2023 പതിപ്പുകളിലും ഇന്ത്യൻ വനിതാ ടീം ജേതാക്കളായിരുന്നു.
മത്സരത്തിന്‍റെ രണ്ടാം പകുതിയിൽ ഇരു ടീമുകൾക്കും അവസരങ്ങൾ ലഭിച്ചെങ്കിലും ഗോൾകീപ്പർമാർ മികച്ച സേവുകള്‍ നടത്തി തങ്ങളുടെ ഗോള്‍വല സംരക്ഷിച്ചു. ഇന്ത്യ ആദ്യപാദത്തിൽ ആക്രമണോത്സുകതയോടെയാണ് കളിച്ചത്. ഒരു പെനാൽറ്റി സ്ട്രോക്കിൽ ലീഡ് ഉയർത്താൻ ദീപികയ്ക്ക് അവസരം ലഭിച്ചെങ്കിലും എതിർ ഗോൾകീപ്പർ കൃത്യമായ ഊഹങ്ങൾ നടത്തി ഗോൾ രക്ഷപ്പെടുത്തി. പിന്നീട് ഇന്ത്യൻ പ്രതിരോധം ടീമിന് വിജയം ഉറപ്പിക്കുന്നതിൽ ഉറച്ചുനിന്നു. മൂന്നാം സ്ഥാനത്തിനായുള്ള മത്സരത്തിൽ ജപ്പാൻ 4-1ന് മലേഷ്യയെ തോൽപിച്ചു.