ഹാർദിക് - നടാഷ ബന്ധത്തിൽ വിള്ളൽ?; സമൂഹമാധ്യമങ്ങളിൽ ചർച്ചകൾ കൊഴുക്കുന്നു - Hardik Pandya and Natasa Stankovic

ഇൻസ്റ്റഗ്രാം ബയോയിൽ നിന്ന് പാണ്ഡ്യയുടെ പേര് നീക്കി നടാഷ സ്റ്റാന്‍കോവിച്ച്. ഇരുവരും പിരിയാൻ ഒരുങ്ങുകയാണെന്ന് അഭ്യൂഹം.

ഇന്ത്യൻ ക്രിക്കറ്റ് താരം ഹാര്‍ദിക് പാണ്ഡ്യയും ഭാര്യ നടാഷ സ്റ്റാൻകോവിച്ചും പിരിയാനൊരുങ്ങുകയാണെന്ന തരത്തിലുള്ള വാർത്തകളാണ് ഇപ്പോൾ സമൂഹ മാധ്യമങ്ങളിൽ ചൂടൻ ചർച്ചകൾക്ക് വഴിവച്ചിരിക്കുന്നത്. നടാഷ തന്‍റെ ഇൻസ്റ്റഗ്രാമിൽ നിന്ന് ഹാർദിക് പാണ്ഡ്യയുടെ പേരു നീക്കിയതോടെയാണ് ഇരുവരും തമ്മിലുള്ള ബന്ധത്തിൽ വിള്ളലുകളുണ്ടെന്ന് അഭ്യൂഹങ്ങൾ പരന്നത്. എന്നാൽ പാണ്ഡ്യയോ, നടാഷയോ ഇതുവരെ ഇക്കാര്യത്തിൽ പ്രതികരിച്ചിട്ടില്ല.

ഈ ഐപിഎൽ സീസണിൽ മുംബൈ ഇന്ത്യൻസ് ക്യാപ്റ്റനായാണ് ഹാർദിക് പാണ്ഡ്യ ക്രീസിലിറങ്ങിയത്. പക്ഷേ ഐപിഎൽ പോയിന്‍റ് ടേബിളിൽ അവസാനക്കാരായി പ്ലേ ഓഫ് കാണാതെ മുംബൈ ഇന്ത്യൻസ് പുറത്തായി. ക്യാപ്റ്റൻസി നഷ്‌ടമായ രോഹിത് ശർമ്മയുടെ ആരാധകരുടെ വെറുപ്പും ഹാര്‍ദിക് പാണ്ഡ്യ ഇത്തവണ സമ്പാദിച്ചു. ഇതിനിടെ തൻ്റെ അർധസഹോദരൻ ബിസിനസിൽ വഞ്ചിച്ചതും താരത്തെ വലച്ചു.

ഇപ്പോഴിതാ കുടുംബജീവിതത്തിലും വിള്ളൽ വന്നുവെന്ന തരത്തിൽ വാർത്തകൾ പരക്കുകയാണ്. ബുധനാഴ്‌ചയാണ് പാണ്ഡ്യയെ ഇൻസ്റ്റഗ്രാം ബയോയിൽ നിന്ന് ഭാര്യ നടാഷ സ്റ്റാൻകോവിച്ച് നീക്കം ചെയ്‌തത്. ഇതാണ് ഊഹാപോഹങ്ങൾക്ക് ആധാരം.

സെർബിയൻ നർത്തകിയും നടിയുമായ നടാഷയും പാണ്ഡ്യയും പരസ്‌പരം അകന്ന് കഴിയുന്നതായും ചില മാധ്യമങ്ങൾ റിപ്പോർട്ട് ചെയ്യുന്നു. മകൻ അഗസ്‌ത്യ ഉൾപ്പെട്ടിട്ടുള്ളതൊഴികെ, പാണ്ഡ്യക്കൊപ്പമുള്ള എല്ലാ പോസ്റ്റുകളും നടാഷ നീക്കം ചെയ്‌തിട്ടുണ്ട്. മാർച്ച് 4 ന് നടാഷയുടെ പിറന്നാൾ ദിനത്തിൽ ഹാർദിക് ആശംസാപോസ്റ്റ് പങ്കുവയ്‌ക്കാത്തതും സംശയങ്ങൾക്ക് വഴിവച്ചു.

എന്നിരുന്നാലും ഹാർദിക് പാണ്ഡ്യയെയും സഹോദരൻ ക്രുണാൽ പാണ്ഡ്യയെയും ഭാര്യ പങ്കുരി ശർമ്മയെയും ഇപ്പോഴും നടാഷയെ ഇൻസ്റ്റഗ്രാമിൽ പിന്തുടരുന്നുണ്ട്. 2020 മെയ് മാസത്തിൽ ആയിരുന്നു ഹാർദിക്കും നടാഷയും തമ്മിലുള്ള വിവാഹം. ഏറെ നാളത്തെ പ്രണയത്തിനൊടുവിലായിരുന്നു വിവാഹം. 2020 ജൂലൈയിൽ ഇവർക്ക് മകൻ പിറന്നു. 2023 ഫെബ്രുവരിയിൽ, ഉദയ്‌പൂരിൽ വച്ച് ഹിന്ദു, ക്രിസ്‌ത്യൻ ആചാരപ്രകാരം ഇവർ വീണ്ടും വിവാഹിതരായി വാർത്തകളിൽ നിറഞ്ഞിരുന്നു.