സഞ്ജുവിന്‍റെ കഠിനാദ്ധ്വാനമാണ് അയാളുടെ നേട്ടങ്ങൾക്ക് കാരണമെന്ന് പരിശീലകന്‍ ഗൗതം ഗംഭീര്‍. ഓസ്ട്രേലിയയ്ക്കെതിരായ ടെസ്റ്റ് പരമ്പരയ്ക്ക് മുമ്പായി നടത്തിയ വാർത്താസമ്മേളനത്തിലാണ് ഗംഭീര്‍ സംഞ്ജു സാംസണെ പ്രശംസിച്ചത്. അന്താരാഷ്ട്ര ടി20 ക്രിക്കറ്റിൽ തുടർച്ചയായി രണ്ട് സെഞ്ച്വറി നേടിയ താരത്തിന്‍റെ പ്രകടനത്തിന്‍റെ ക്രെഡിറ്റ് ഗംഭീറിന് എന്നായിരുന്നു പ്രസ് കോണ്‍ഫറന്‍സില്‍ ഒരു മാധ്യമപ്രവര്‍ത്തകന്‍ ഗംഭീറിനോട് പറഞ്ഞത്.
'സമീപകാല മത്സരങ്ങളിലെ സഞ്ജുവിന്‍റെ മികച്ച ബാറ്റിങ് പ്രകടനവുമായി തനിക്ക് ഒരു ബന്ധവുമില്ല, അത് അവന്‍റെ കഴിവാണ്. അവനു ശരിയായ സ്ഥാനം നൽകി മികച്ച പ്രകടനത്തിനായി പിന്തുണ നല്‍കുകയായിരുന്നു. ആത്യന്തികമായി ഇത് സഞ്ജുവിന്‍റെ കഠിനാധ്വാനമാണ്. ഇന്ത്യൻ ക്രിക്കറ്റിന് വേണ്ടി അവനില്‍ നിന്ന് വരുന്നത് തുടക്കം മാത്രമാണ്. അത് അവസാനമല്ല. ഈ ഫോം സഞ്ജുവിന് മുന്നോട്ട് കൊണ്ടുപോകാൻ കഴിയുമെന്ന് പ്രതീക്ഷിക്കുന്നു," ഗംഭീർ പറഞ്ഞു.
നിരവധി യുവ ക്രിക്കറ്റ് താരങ്ങൾ ഉയർന്നുവരുന്നതും നന്നായി ചെയ്യുന്നതും നല്ല സൂചനയാണ്. ഇന്ത്യൻ ക്രിക്കറ്റിന് ആരോഗ്യകരമാണെന്നും ഗംഭീര്‍ അഭിപ്രായപ്പെട്ടു. നിലവില്‍ ബോര്‍ഡര്‍ ഗാവസ്കര്‍ ട്രോഫിക്കുള്ള ഇന്ത്യന്‍ ടീമിനൊപ്പമാണ് ഗംഭീര്‍.