ബ്രിസ്‌ബേന്‍:വെസ്റ്റ് ഇന്‍ഡീസ് യുവനിര ഗാബയില്‍ കരുത്തരായ ഓസ്‌ട്രേലിയന്‍ ടീമിനെതിരെ ചരിത്ര ജയം നേടിയതിന് പിന്നാലെ കണ്ണീരണിഞ്ഞ് വിന്‍ഡീസ് മുന്‍ താരങ്ങളായ ബ്രയാന്‍ ലാറയും (Brian Lara) കാള്‍ ഹൂപ്പറും (Carl Hooper). ഓസ്‌ട്രേലിയക്കെതിരായ രണ്ടാം ക്രിക്കറ്റ് ടെസ്റ്റിന്‍റെ നാലം ദിനമായിരുന്ന ഇന്നലെ എട്ട് റണ്‍സിന്‍റെ ആവേശകരമായ ജയമായിരുന്നു വിന്‍ഡീസ് സ്വന്തമാക്കിയത്. വിന്‍ഡീസ് താരങ്ങള്‍ മൈതാനത്ത് ചരിത്രം തിരുത്തിക്കുറിച്ചതിന് പിന്നാലെയാണ് മുന്‍താരങ്ങള്‍ വികാരാധീനരായി പ്രതികരണം നടത്തിയത്.
27 വര്‍ഷത്തെ ഇവടേളയ്‌ക്ക് ശേഷം ഓസ്‌ട്രേലിയന്‍ മണ്ണില്‍ വെസ്റ്റ് ഇന്‍ഡീസ് ടീം സ്വന്തമാക്കിയ ആദ്യത്തെ ടെസ്റ്റ് വിജയമായിരുന്നു ഗാബയിലേത്. 1997ല്‍ പെര്‍ത്തില്‍ വച്ചായിരുന്നു ഇതിന് മുന്‍പ് വിന്‍ഡീസ് അവസാനമായി ഓസ്‌ട്രേലിയക്കെതിരെ ടെസ്റ്റില്‍ ജയം നേടിയത്. വിന്‍ഡീസ് യുവനിര ഗാബയില്‍ പുതിയ ചരിത്രം കുറിക്കുമ്പോള്‍ കമന്‍ററി ബോക്‌സിലായിരുന്നു ഇതിഹാസതാരം ബ്രയാന്‍ ലാറ.
നിറകണ്ണുകളോടെയായിരുന്നു ലാറ കമന്‍ററി ബോക്‌സിലിരുന്ന് കളി വിവരണം നടത്തിയത് (Brian Lara Emotional Reaction After West Indies Win Against Australia). ഡ്രസിങ് റൂമിലായിരുന്നു വിന്‍ഡീസ് സഹപരിശീലകനായ കാള്‍ ഹൂപ്പര്‍ (Carl Hooper Reaction On West Indies Test Win At Gabba). ജയത്തിന് പിന്നാലെ ആനന്ദ കണ്ണുനീര്‍ പൊഴിക്കുന്ന താരത്തിന്‍റെ വീഡിയോയും സമൂഹമാധ്യമങ്ങളിലൂടെ പ്രചരിക്കുന്നുണ്ട്.