കൊൽക്കത്ത: വീട്ടിലെ പടിക്കെട്ടില്‍ നിന്ന് വീണ് ബംഗാള്‍ ക്രിക്കറ്റ് താരം ആസിഫ് ഹുസൈൻ (28) മരിച്ചു. തിങ്കളാഴ്‌ച രാത്രിയാണ് വീട്ടില്‍ നിന്ന് വീണ് ഗുരുതരമായി പരുക്കേറ്റത്. ഉടന്‍ സമീപത്തെ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. വീഴ്‌ചയില്‍ തലയ്‌ക്കേറ്റ പരുക്കാണ് താരത്തെ മരണത്തിലേക്ക് എത്തിച്ചത്.
ബംഗാള്‍ ക്രിക്കറ്റ് ടീമിലെ വിവിധ തലങ്ങളില്‍ കളിച്ചിട്ടുള്ള ആസിഫ് ബംഗാൾ പ്രോ ടി20 ലീഗില്‍ മികച്ച പ്രകടനം നടത്തിയിരുന്നു. അഡ്‌മാസ് ഹൗറ വാരിയേഴ്‌സിനായി ഇറങ്ങിയ ആസിഫ് 57 പന്തില്‍ 99 റണ്‍സ് നേടി തിളങ്ങിയിരുന്നു. 2024ല്‍ ക്ലബ്ബ് ക്രിക്കറ്റിൽ സ്പോർട്ടിംഗ് യൂണിയനുമായി താരം ഒപ്പുവച്ചിരുന്നു. സംസ്ഥാന ടീമിൽ കളിച്ചില്ലെങ്കിലും ക്ലബ് ക്രിക്കറ്റിൽ അറിയപ്പെടുന്ന താരമായിരുന്നു ആസിഫ് ഹുസൈൻ.