ന്യൂഡൽഹി: കാൺപൂരിൽ നടന്ന രണ്ടാം ടെസ്റ്റിൽ ബംഗ്ലാദേശിനെ 7 വിക്കറ്റിന് ഇന്ത്യ തകർത്തു. പരമ്പരയുടെ വിജയശില്‍പിയായ ഇന്ത്യയുടെ സ്റ്റാർ ഓഫ് സ്‌പിന്നർ രവിചന്ദ്രൻ അശ്വിന്‍ തന്‍റെ പേരില്‍ ലോകറെക്കോര്‍ഡും കുറിച്ചു. ടെസ്റ്റില്‍ ഏറ്റവും കൂടുതല്‍ തവണ പരമ്പരയുടെ താരമാകുന്ന കളിക്കാരനെന്ന മുത്തയ്യ മുരളീധരന്‍റെ റെക്കോര്‍ഡിനൊപ്പമാണ് അശ്വിനുമെത്തിയത്. 11 തവണയാണ് ഇരുവരും പരമ്പരയുടെ താരമായത്.
60 ടെസ്റ്റ് പരമ്പരകളിൽ 11 എണ്ണത്തിലും മുത്തയ്യ പ്ലെയർ ഓഫ് ദി സീരീസ് പുരസ്‌കാരം നേടിയിരുന്നു. ഇപ്പോഴിതാ 39 ടെസ്റ്റ് പരമ്പരകളിൽ 11 തവണ നേടിയാണ് അശ്വിൻ മുരളീധരനൊപ്പമെത്തിയത്.
ഇന്ത്യയും ബംഗ്ലാദേശും തമ്മിൽ നടന്ന പരമ്പരയിലെ ആദ്യ മത്സരത്തില്‍ ആദ്യ ഇന്നിങ്സിലാണ് അശ്വിൻ സെഞ്ച്വറി നേടിയത്. 114 റൺസാണ് താരത്തിന്‍റെ പേരിൽ രേഖപ്പെടുത്തിയത്. കൂടാതെ ആകെ 11 വിക്കറ്റുകളും അശ്വന്‍ സ്വന്തമാക്കി. ആദ്യ മത്സരത്തിൽ 6 വിക്കറ്റും രണ്ടാം മത്സരത്തിൽ 5 വിക്കറ്റുമാണ് അശ്വിൻ വീഴ്ത്തിയത്.