ന്യൂഡൽഹി: പാരീസ് പാരാലിമ്പിക്‌സ് ബാഡ്‌മിന്‍റണ്‍ മെഡൽ ജേതാക്കളെ ആദരിക്കുമെന്ന് ഇന്ത്യൻ ബാഡ്‌മിന്‍റണ്‍ അസോസിയേഷൻ പ്രസിഡന്‍റും അസം മുഖ്യമന്ത്രിയുമായ ഡോ. ഹിമന്ത ബിശ്വ ശർമ അറിയിച്ചു. താരങ്ങള്‍ക്ക് 50 ലക്ഷം രൂപം പാരിതോഷികമായി നല്‍കും. ഒരു സ്വർണം, രണ്ട് വെള്ളി, രണ്ട് വെങ്കലവുമടക്കം അഞ്ച് മെഡലുകളാണ് ഇന്ത്യ സ്വന്തമാക്കിയത്.
പുരുഷ സിംഗിൾസ് എസ്.എല്‍ 3 വിഭാഗത്തിൽ നിതേഷ് കുമാർ സ്വർണം നേടിയപ്പോൾ സുഹാസ് യതിരാജ് (പുരുഷ സിംഗിൾസ് എസ്.എല്‍ 4) വെള്ളി കരസ്ഥമാക്കി. തുളസിമതി മുരുകേശൻ, മനീഷ രാമദാസ്, നിത്യ ശ്രീ ശിവൻ എന്നിവർ പാരാലിമ്പിക്‌സിൽ മെഡൽ നേടുന്ന ആദ്യ ഇന്ത്യൻ വനിതാ ഷട്ടർമാരായി ചരിത്രം സൃഷ്ടിച്ചു. വനിതകളുടെ എസ്.യു 5 സിംഗിൾസിൽ തുളസിമതി വെള്ളിയും മനീഷ വെങ്കലവും നേടി. എസ്എച്ച്6 വിഭാഗത്തിൽ നിത്യ വെങ്കലം നേടി.