റഷ്യയില്‍ ഭൂകമ്പം, ഷിവേലുച്ച് അഗ്നിപർവ്വതം പൊട്ടിത്തെറിച്ചു; സുനാമി മുന്നറിയിപ്പ് - Volcano Eruption In Russia

റഷ്യയിലെ വൻ ഭൂകമ്പത്തിന് പിന്നാലെ ഷിവേലുച്ച് അഗ്നിപർവ്വതം പൊട്ടിത്തെറിച്ചു. യുഎസ് സുനാമി മുന്നറിയിപ്പ് പ്രഖ്യാപിച്ചു.

മോസ്കോ: റഷ്യയില്‍ അഗ്നിപർവ്വത സ്‌ഫോടനം. ഷിവേലുച്ച് അഗ്നിപർവ്വതമാണ് പൊട്ടിത്തെറിച്ചത്. 7.0 തീവ്രത രേഖപ്പെടുത്തിയ ഭൂകമ്പത്തിന് ശേഷമായിരിന്നു അഗ്നിപർവ്വത സ്‌ഫോടനം. ആളപായം റിപ്പോർട്ട് ചെയ്‌തിട്ടില്ല.

സ്‌ഫോടനത്തില്‍ വലിയ നാശനഷ്‌ടങ്ങളും റിപ്പോര്‍ട്ട് ചെയ്‌തിട്ടില്ല. കെട്ടിടങ്ങൾക്ക് കേടുപാടുകൾ സംഭവിച്ചിട്ടുണ്ടോയെന്ന് പരിശോധിച്ചുവരികയാണ്. 8 കിലോമീറ്റർ ഉയരത്തില്‍ പുക ഉയരുകയും ലാവ പുറത്തേക്ക് ഒഴുകുകയും ചെയ്‌തു.

റഷ്യൻ എമർജൻസി മന്ത്രാലയം സുനാമി മുന്നറിയിപ്പ് പുറപ്പെടുവിച്ചിട്ടില്ല. യുഎസ് റഷ്യന്‍ തീരങ്ങളില്‍ സുനാമി മുന്നറിയിപ്പ് നല്‍കിയിട്ടുണ്ട്. സ്‌ഫോടനത്തിന്‍റെ പ്രഭവകേന്ദ്രത്തിൽ നിന്ന് 300 കിലോമീറ്ററിനുള്ളിൽ സുനാമി ഉണ്ടാകാനുളള സാധ്യതയാണ് യുഎസ് സുനാമി മുന്നറിയിപ്പ് സംവിധാനം പ്രവചിച്ചിരിക്കുന്നത്.