'മീനച്ചിലാറിന്‍റെ തീരം മാമലയോരം' എന്ന വരികളോടെ ആരംഭിക്കുന്ന മനോഹരമായ കപ്പപ്പാട്ട് പുറത്തിറങ്ങി. അജുവര്‍ഗീസ്, ജോണി ആന്‍റണി എന്നിവര്‍ ഒന്നിക്കുന്ന 'സ്വര്‍ഗം' എന്ന ചിത്രത്തിലെ ആദ്യ ഗാനമാണ് പുറത്തിറങ്ങിയത്. ഗാനം ആലപിച്ചിരിക്കുന്നത് സൂരജ് സന്തോഷാണ്. ബി കെ ഹരിനാരായണന്‍റെ വരികള്‍ക്ക് ബിജിപാലാണ് സംഗീതം പകര്‍ന്നിരിക്കുന്നത്. 'ഒരു സെക്കന്‍റ് ക്ലാസ് യാത്ര' എന്ന ചിത്രത്തിന് ശേഷം റെജിസ് ആന്‍റണി സംവിധാനം ചെയ്യുന്ന സിനിമയാണിത്. റെജിസ് ആന്‍റണിയും റോസ് റെജിസും ചേര്‍ന്ന് തിരക്കഥ, സംഭാഷണം എന്നിവ തയാറാക്കിയ ചിത്രത്തിന്‍റെ കഥ ലിസി കെ ഫെര്‍ണാണ്ടസിന്‍റേതാണ്.
അനന്യ, സിജോയ് വര്‍ഗീസ്, വിനീത് തട്ടില്‍, സജിന്‍ ചെറുകയില്‍, അഭിറാം രാധാകൃഷ്‌ണന്‍, രഞ്ജി കങ്കോല്‍, ഉണ്ണി രാജ, പുത്തില്ലം ഭാസി, മനോഹരി ജോയ്, കുടശ്ശനാട് കനം, തുഷാര പിള്ള, ആക്ഷന്‍ ഹീറോ ബിജു ഫെയിം മേരി ചേച്ചി, മഞ്ചാടി ജോബി തുടങ്ങിയവര്‍ പ്രധാന കഥാപാത്രങ്ങളെ അവതരിപ്പിക്കുന്നു.