സോണിയ അഗർവാളും ജിനു ഇ തോമസും കേന്ദ്ര കഥാപാത്രങ്ങളായെത്തുന്ന 'ബിഹൈൻഡ്' എന്ന ചിത്രത്തിന്‍റെ ടീസർ പുറത്ത്. മഞ്ജു വാര്യരുടെയും രമ്യ കൃഷ്‌ണന്‍റെയും സോഷ്യൽ മീഡിയ പേജുകളിലൂടെയാണ് ടീസർ റിലീസ് ചെയ്‌തത്. തമിഴിലും മലയാളത്തിലുമായി റിലീസിന് എത്തുന്ന സിനിമയുടെ ഏറെ കൗതുകമുണർത്തുന്ന ഒപ്പം ആകാംക്ഷയേറ്റുന്ന ടീസറാണ് പുറത്തുവന്നിരിക്കുന്നത്.
അമൻ റാഫിയാണ് ഈ ചിത്രത്തിന്‍റെ സംവിധാനം. പാവക്കുട്ടി ക്രിയേഷൻസിന്‍റെ ബാനറിൽ ഷിജ ജിനു നിർമിച്ചിരിക്കുന്ന 'ബിഹൈൻഡ്' ഹൊറർ സസ്‌പെൻസ് ത്രില്ലറായാണ് ഒരുക്കിയിരിക്കുന്നത്. നിർമാതായ ഷിജ ജിനു തന്നെയാണ് 'ബിഹൈൻഡി'ന്‍റെ തിരക്കഥാകൃത്തും.
സോണിയ അഗർവാളിന്‍റെ മലയാളത്തിലേക്കുള്ള മടങ്ങിവരവ് ആഘോഷമാക്കാനുള്ള ഒരുക്കത്തിലാണ് ആരാധകർ. ഒരു പതിറ്റാണ്ട് നീണ്ട ഇടവേള അവസാനിപ്പിച്ചാണ് സോണിയ അഗർവാൾ മലയാള സിനിമയില്‍ റീ എൻട്രി നടത്തുന്നത് എന്നതും ശ്രദ്ധേയമാണ്. 'റെയിൻബോ കോളനി, കാതൽ കൊണ്ടേൻ, മധുരൈ, പുതുപ്പേട്ടൈ, കോവിൽ' തുടങ്ങിയ ഹിറ്റ് ചിത്രങ്ങളിലൂടെ ശ്രദ്ധേയയായ സോണിയ അഗർവാളിന് ഈ സിനിമ ഒരു മികച്ച തിരിച്ചുവരവ് ആയിരിക്കുമെന്നാണ് പ്രതീക്ഷ.
അതേസമയം പ്രേക്ഷകരെ ഭീതിയുടെ മുൾമുനയിൽ നിർത്തുന്ന ഭയാനകമായ ടീസറാണ് അണിയറ പ്രവർത്തകർ പുറത്തുവിട്ടിരിക്കുന്നത്. ദുരൂഹത നിറഞ്ഞ ഒരു ബംഗ്ലാവിലാണ് ഈ സിനിമയുടെ കഥ പുരോഗമിക്കുന്നത്. ഇവിടെ ഒളിഞ്ഞിരിക്കുന്ന നിഗൂഢമായ വസ്‌തുതകൾ പുറത്തു കൊണ്ടുവരികയാണ് 'ബിഹൈൻഡ്' എന്ന ഈ ഹൊറർ ചിത്രം.