പ്രശസ്‌ത സോഷ്യൽ മീഡിയ ഇൻഫ്ലുവൻസറും ബിഗ് ബോസ് താരവുമായ അപർണ മൾബറിയെ പ്രധാന കഥാപാത്രമാക്കി മാധ്യമപ്രവർത്തകനായ ഇ എം അഷ്‌റഫ് സംവിധാനം ചെയ്യുന്ന ചിത്രമാണ് 'മോണിക്ക ഒരു എ ഐ സ്റ്റോറി'. സാംസ് പ്രൊഡക്ഷന്‍റെ ബാനറിൽ മൻസൂർ പള്ളൂർ ആണ് നിർമാണം. എ ഐ സാങ്കേതികവിദ്യയും കഥാപാത്രങ്ങളും പരസ്പരം സമന്വയിക്കുന്ന ഇന്ത്യയിലെ തന്നെ ആദ്യ സിനിമയാണ് മോണിക്ക ഒരു എ ഐ സ്റ്റോറി. ജൂൺ 21ന് ചിത്രം കേരളത്തിൽ പ്രദർശനത്തിന് എത്തും.
ഇന്ത്യയിലെ ആദ്യ എഐ സിനിമയായി ചിത്രത്തെ ഇന്ത്യ ഗവൺമെന്‍റിനു കീഴിലുള്ള എ ഐ പോർട്ടൽ അംഗീകരിച്ചിട്ടുണ്ട്. നിലവിൽ സോഷ്യൽ മീഡിയയിൽ സജീവമായ അപർണ, ചലച്ചിത്ര രംഗത്തേക്ക് ആദ്യമായി ചുവടുറപ്പിക്കുകയാണ്. നിർമാതാവ് മൻസൂർ പള്ളൂരും, സംവിധായകൻ ഇ എം അഷ്റഫും ചേർന്നാണ് സിനിമയുടെ തിരക്കഥ തയ്യാറാക്കിയിരിക്കുന്നത്.
മജീഷ്യൻ ഗോപിനാഥ് മുതുകാട്, ബാലതാരം ശ്രീപത് യാൻ, സിനി അബ്രഹാം, മണികണ്‌ഠൻ, കണ്ണൂർ ശ്രീലത, അജയൻ കല്ലായ്, അനിൽ ബേബി, ആൽബർട്ട് അലക്‌സ് ,ശുഭ കാഞ്ഞങ്ങാട് ,പി കെ അബ്‌ദുള്ള, പ്രസന്നൻ പിള്ള, വിശ്വനാഥ്, ആനന്ദജ്യോതി ,ഷിജിത്ത് മണവാളൻ, ഹരി കാഞ്ഞങ്ങാട്, വിഞ്ചു വിശ്വനാഥ്, പ്രീതി കീക്കാൻ, ആൻമിരദേവ്, ഹാതിം, അലൻ തുടങ്ങിയവരാണ് മറ്റു പ്രധാന വേഷങ്ങളിൽ എത്തുന്നത്.