24വർഷങ്ങൾക്ക് ശേഷം 4കെ അറ്റ്‌മോസ് ദൃശ്യ ശ്രവ്യ ചാരുതയോടെ ദേവദൂതൻ വീണ്ടുമെത്തിയപ്പോൾ ഇരുകയ്യും നീട്ടി സ്വീകരിച്ച് മലയാളായി പ്രേക്ഷകർ. വിദ്യാസാഗറിന്‍റെ സംഗീത മന്ത്രികതയിലും ലോക നിലവാരത്തിലുള്ള ഫ്രെയിമുകളിലൂടെയും ചിത്രം പ്രേക്ഷകരെ തീയേറ്ററിനുള്ളിൽ ഒരു സ്വപ്‌ന ലോകത്തേക്ക് കൂട്ടികൊണ്ടു പോകുന്നു. 24 വർഷം മുൻപ് പ്രേക്ഷകർ നിഷ്‌കരുണം നിരസിച്ച ചിത്രം ക്ലാസിക് പരിവേഷത്തോടെ പുതിയ ലോകം ഏറ്റെടുത്ത സന്തോഷം നടൻ മോഹൻലാൽ പങ്കുവച്ചു.
ദേവദൂതന്‍റെ റീ-റിലീസ് പുതിയ പോസ്റ്റർ സോഷ്യൽ മീഡിയയിൽ പ്രസിദ്ധീകരിച്ചു കൊണ്ടാണ് മോഹൻലാൽ തന്‍റെ വാക്കുകൾ കുറിച്ചത്. '24 വർഷങ്ങൾക്ക് ശേഷം ദേവദൂതൻ സിനിമ വീണ്ടും കാണാനിടയായി. ഒരു ദേവദൂതൻ്റെ അനുഗ്രഹം അസാധാരണമായ ചാരുതയുള്ള ഓരോ ഫ്രെയിമിലും സ്‌പർശിക്കുന്നതുപോലെ തോന്നുന്നു. മുഴുവൻ ടീമിനും അഭിനന്ദനങ്ങൾ' -മോഹൻലാലിന്‍റെ വാക്കുകൾ ഇങ്ങനെ. ചിത്രത്തിന്‍റെ പുതിയ പതിപ്പിന് മികച്ച പ്രതികരണമാണ് ലഭിക്കുന്നത്.