സംവിധായകൻ എസ് എസ് രാജമൗലിയുടെ മകൻ എസ് എസ് കാർത്തികേയ ചലച്ചിത്ര നിർമാണ രംഗത്തേക്ക്. എസ് എസ് കാർത്തികേയ ആദ്യമായി നിർമിക്കുന്ന രണ്ട് ചിത്രങ്ങൾ പ്രഖ്യാപിച്ചു. മലയാളികളുടെ പ്രിയ താരം ഫഹദ് ഫാസിലാണ് ഈ രണ്ട് സിനിമകളിലും നായകനായി എത്തുന്നത്.
'ഓക്‌സിജൻ', 'ഡോണ്ട് ട്രബിൾ ദി ട്രബിൾ' എന്നി ചിത്രങ്ങളാണ് എസ് എസ് കാർത്തികേയ നിർമിക്കുന്നത്. ആർക മീഡിയവർക്ക്‌സ് ആൻഡ് ഷോയിങ് ബിസിനസിന്‍റെ (Arka Mediaworks & Showing Business) ബാനറിലാണ് നിർമാണം. രാജമൗലിയാണ് ഈ സിനിമകൾ പ്രേക്ഷകർക്ക് മുന്നിൽ അവതരിപ്പിക്കുന്നത്. തെലുഗുവിനൊപ്പം മലയാളം, കന്നഡ, തമിഴ് ഭാഷകളിലാണ് ചിത്രങ്ങൾ ഒരുങ്ങുന്നത്.
സിദ്ധാർഥ് നദെല്ലയാണ് 'ഓക്‌സിജൻ' സിനിമയുടെ സംവിധായകൻ. 'ഡോണ്ട് ട്രബിൾ ദി ട്രബിൾ' ശശാങ്ക് യലേതിയാണ് സംവിധാനം ചെയ്യുന്നത്. ഈ രണ്ട് സിനിമകളുടെയും ഫസ്റ്റ് ലുക്ക് പോസ്റ്ററുകളും പുറത്തുവന്നു. വേറിട്ട പ്രമേയവുമായാകും ഇരു സിനിമകളും എത്തുക എന്ന സൂചന നൽകുന്നതാണ് പോസ്റ്ററുകൾ.
യഥാർഥ സംഭവങ്ങളിൽ നിന്ന് പ്രചോദനം ഉൾക്കൊണ്ടാണ് 'ഓക്‌സിജൻ' ഒരുക്കുന്നതെന്ന് ഫസ്റ്റ് ലുക്ക് പോസ്റ്റർ പങ്കുവച്ചുകൊണ്ട് നിർമാതാവ് എസ് എസ് കാർത്തികേയ കുറിച്ചു. പരിവർത്തനത്തിൻ്റെയും സൗഹൃദത്തിൻ്റെയും കഥയാണ് ഈ ചിത്രം പറയുന്നതെന്നും അദ്ദേഹം വ്യക്തമാക്കി.