ദുൽഖർ സൽമാൻ നായകനായ പാൻ ഇന്ത്യൻ തെലുങ്ക് ചിത്രം 'ലക്കി ഭാസ്‌കറിന്' മികച്ച പ്രേക്ഷക പ്രതികരണം. ദീപാവലി ദിനമായ ഇന്നാണ് (ഒക്ടോബർ 31) ആഗോള തലത്തില്‍ ചിത്രം പ്രദര്‍ശനത്തിന് എത്തിയത്. ഒട്ടേറെ ട്വസ്റ്റുകളും പ്രേക്ഷകരെ മുള്‍മുനയില്‍ നിര്‍ത്തുന്ന സംഭവ വികാസങ്ങളും ചിത്രത്തില്‍ ഉണ്ടെന്നാണ് സിനിമ കണ്ട പ്രേക്ഷകര്‍ എക്‌സില്‍ കുറിക്കുന്നത്.
ഇതേ സമയം തെലുഗില്‍ വലിയ സാധ്യതയാണ് ദുല്‍ഖറിന് ഉള്ളതെന്നും അഭിപ്രായപ്പെടുന്നവരുമുണ്ട്. ആദ്യ ഹിറ്റ് ദുൽഖർ സ്വന്തമാക്കിയെന്നും വളരെ മികച്ച തിരക്കഥയാണ് സിനിമയുടേതെന്നുമാണ് ആദ്യ പ്രതികരണങ്ങൾ. ചിത്രത്തിലെ ദുൽഖറിന്‍റെ പ്രകടനത്തെയും പ്രേക്ഷകർ പ്രശംസിക്കുന്നുണ്ട്.
അതേസമയം ഇന്നലെ വൈകുന്നേരം ഏഴ് മണി മുതല്‍ പ്രിവ്യു ഷോകള്‍ ഉണ്ടായിരുന്നു. പല ഷോകളും നേരത്തെ തന്നെ ഫുള്‍ ആയിരുന്നു.
പ്രേക്ഷകര്‍ മികച്ച രീതിയില്‍ തന്നെ ചിത്രത്തെ ഏറ്റെടുത്തതോടെ ആദ്യത്തേക്കാല്‍ അധികം ഷോസ് ആണ് സിനിമയ്ക്കായി നിര്‍മാതാക്കള്‍ ചാര്‍ട്ട് ചെയ്‌തത്. 100 ൽ അധികം പ്രിവ്യൂ ഷോകളായിരുന്നു നിർമാതാക്കൾ റിലീസിന്‍റെ തലേദിവസം സംഘടിപ്പിച്ചത്.
വെങ്കി അറ്റ്ലൂരി രചനയും സംവിധാനവും നിർവഹിച്ച ചിത്രം ഭാഗ്യത്തിനും ആഗ്രഹ പൂർത്തീകരണത്തിനുമായുള്ള ഭാസ്‌കറിന്‍റെ ജീവിത യാത്രയുടെ സാരാംശമാണ് ഉൾക്കൊള്ളുന്നത്. ഒരു സാധാരണക്കാരനായ നായകന്‍റെ ദൈനംദിന സ്വപ്‌നങ്ങള്‍, പോരാട്ടങ്ങൾ, വിജയങ്ങൾ എന്നിവ ഉൾക്കൊള്ളുന്ന സിനിമാനുഭവമാണ് ലക്കി ഭാസ്‌കര്‍ എന്നിവയിലൂടെ പറയുന്നത്.
ഭാസ്‌കര്‍ എന്ന മിഡിൽ ക്ലാസ്സുകാരനായ ഒരു ബാങ്ക് ഉദ്യോഗസ്ഥനായിട്ടാണ് ദുൽഖർ ചിത്രത്തില്‍ വേഷമിടുന്നത്. പീരീഡ് ഡ്രാമ ത്രില്ലറിൽ പ്രദര്‍ശനത്തിന് എത്തിയ ഈ ചിത്രത്തില്‍ നായികാ വേഷം ചെയ്യുന്നത് മീനാക്ഷി ചൗധരിയാണ്.