ധനുഷ് ആരാധകർ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് രായൻ. ധനുഷ് നായകനാകുന്ന ഈ ചിത്രം സംവിധാനം ചെയ്യുന്നതും താരം തന്നെയാണ്. അതുകൊണ്ടുതന്നെ ആരാധകരുടെ പ്രതീക്ഷകളും വാനോളമാണ്.
2024-ലെ ഏറ്റവും പ്രതീക്ഷയോടെ കാത്തിരിക്കുന്ന പ്രൊജക്‌റ്റുകളിൽ ഒന്നാണ് രായൻ. ആക്ഷൻ ത്രില്ലറായി അണിയിച്ചൊരുക്കുന്ന ഈ ചിത്രത്തിന് പ്രഖ്യാപനം മുതൽ തന്നെ വ്യാപകമായ സ്വീകാര്യതയാണ് ലഭിച്ചത്. ഇപ്പോഴിതാ സിനിമയിലെ പാട്ടിന്‍റെ റിലീസുമായി ബന്ധപ്പെട്ട വാർത്തയാണ് സമൂഹ മാധ്യമങ്ങളിൽ തരംഗമാവുന്നത്. സിനിമയുടെ ആദ്യ ഗാനത്തിന്‍റെ റിലീസുമായി ബന്ധപ്പെട്ട് നേരത്തെ റിപ്പോർട്ടുകൾ വന്നിരുന്നുവെങ്കിലും ഒരു സ്ഥിരീകരണവും നൽകിയിരുന്നില്ല.
എന്നാൽ രായനിലെ ആദ്യ സിംഗിൾ മെയ് 9 ന് റിലീസ് ചെയ്യുമെന്ന് നിർമ്മാതാക്കളായ സൺ പിക്‌ചേഴ്‌സ് ഇപ്പോൾ സ്ഥിരീകരിച്ചിരിക്കുകയാണ്. ധനുഷിൻ്റെ ത്രില്ലിംഗ് പോസ്റ്റർ ഇൻസ്റ്റഗ്രാമിൽ പങ്കിട്ടാണ് പ്രൊഡക്ഷൻ ഹൗസ് സൺ പിക്‌ചേഴ്‌സ് ചിത്രത്തിൻ്റെ ആദ്യ സിംഗിളിൻ്റെ റിലീസ് തീയതി പ്രഖ്യാപിച്ചത്. രായൻ 2024 ജൂണിൽ തിയേറ്ററുകളിൽ എത്തുമെന്നും നിർമാതാക്കൾ അറിയിച്ചു.