ക്രിഷ് ജാഗർലമുഡിയും അനുഷ്‌ക ഷെട്ടിയും വീണ്ടും ഒന്നിക്കുന്ന ചിത്രമാണ് 'ഘാട്ടി'. 'ഘാട്ടി'യുടെ ഫസ്റ്റ് ലുക്കും ടീസറും പുറത്ത്. അനുഷ്‌ക ഷെട്ടിയുടെ ജന്‍മദിനത്തോടനുബന്ധിച്ചാണ് സിനിയിലെ താരത്തിന്‍റെ ഫസ്റ്റ് ലുക്കും ടീസറും അണിയറപ്രവര്‍ത്തകര്‍ പുറത്തുവിട്ടത്.
വിക്‌ടിം, ക്രിമിനൽ, ലെജൻഡ് എന്ന ടാഗ്‌ലൈനോടു കൂടിയാണ് നിര്‍മ്മാതാക്കള്‍ 'ഘാട്ടി' പോസ്‌റ്റര്‍ പുറത്തുവിട്ടത്. എതിരാളിയുടെ കഴുത്തറുത്ത്, ആ തലയുമായി നടന്നുപോകുന്ന അനുഷ്‌കയെയാണ് ടീസറില്‍ കാണാനാവുക.
കണ്ണുനീർ നിറഞ്ഞ കണ്ണുകളുമായി നെറ്റിയില്‍ പൊട്ടും, രണ്ട് മൂക്കുകുത്തികളും അണിഞ്ഞ് ചുരുട്ട് വലിച്ചു കൊണ്ടാണ് അനുഷ്‌കയുടെ കഥാപാത്രത്തെ ഫസ്റ്റ് ലുക്കില്‍ അവതരിപ്പിച്ചിരിക്കുന്നത്. തലയിൽ നിന്നും കൈകളിൽ നിന്നും രക്‌തം ചൊരിയുന്ന രൂപത്തിൽ അതിശയകരവും ക്രൂരവുമായ ഒരു അവതാരത്തെയാണ് ഫസ്റ്റ് ലുക്കില്‍ അനുഷ്‌കയെ കാണാനാവുക.
ഒരേ സമയം ഗൗരവമുള്ളതും ധീരവുമായ രൂപത്തിലാണ് അനുഷ്‌കയുടെ കഥാപാത്രത്തെ ഒരുക്കിയിരിക്കുന്നത്. ജീവിതത്തിലെ ക്രൂരമായ യാഥാർത്ഥ്യത്തിൽ നിന്നും ഒഴിഞ്ഞുമാറാത്ത ഒരു ചിത്രമായിരിക്കും 'ഘാട്ടി' എന്നാണ് ഫസ്റ്റ് ലുക്ക് സൂചിപ്പിക്കുന്നത്. അവൾ വസിക്കുന്ന ഇരുണ്ടതും അപകടകരവുമായ ലോകത്തേയ്‌ക്ക് ആഴത്തിൽ ഇറങ്ങിച്ചെല്ലുന്ന കഥയാവും ചിത്രം പറയുന്നതെന്നും ഫസ്റ്റ് ലുക്ക് സൂചന നല്‍കുന്നു.
അതിജീവനത്തിന് പ്രതിരോധശേഷി മാത്രമല്ല, ക്രൂരതയും ആവശ്യമാണെന്ന ടോണിൽ ഒരുക്കിയിരിക്കുന്ന പോസ്‌റ്റർ വൈകാരികവും തീവ്രവും ഒരുപക്ഷേ ദാരുണവുമായ ഒരു യാത്രയ്ക്ക് കൂടിയാണ് ഒരുങ്ങുന്നതെന്ന സൂചനയും പ്രേക്ഷകർക്ക് നൽകുന്നു.