വാൽമീകി കോർപ്പറേഷൻ അഴിമതിക്കേസ്: 700ലധികം അക്കൗണ്ടുകളിലേക്ക് പണം കൈമാറിയതായി അന്വേഷണ സംഘം - VALMIKI CORPORATION SCAM

കോർപ്പറേഷനിലെ ഉദ്യോഗസ്ഥനായ ചന്ദ്രശേഖറിന്‍റെ ആത്മഹത്യ കുറിപ്പിലൂടെയാണ് അഴിമതി നടന്നതായി പുറത്തറിയുന്നത്. 700ലധികം അക്കൗണ്ടുകളിലേക്ക് പണം കൈമാറിയതായാണ് എസ്ഐടി കണ്ടെത്തിയത്. 94.73 കോടി രൂപയാണ് വിവിധ അക്കൗണ്ടുകളിലേക്ക് കൈമാറിയത്.

ബെംഗളൂരു : വാൽമീകി പട്ടികവർഗ വികസന കോർപ്പറേഷൻ അഴിമതിക്കേസിൽ സുപ്രധാന തെളിവുകൾ ശേഖരിച്ച് അന്വേഷണ സംഘം. 700ലധികം അക്കൗണ്ടുകളിലേക്ക് പണം കൈമാറിയതായി എസ്ഐടി. 18 അക്കൗണ്ടുകളിലേക്ക് തുക കൈമാറിയതായി ആയിരുന്നു പ്രാഥമിക നിഗമനം. എന്നാൽ നൂറുകണക്കിന് അക്കൗണ്ടുകളിലേക്ക് പണം കൈമാറിയതായി പിന്നീട് കണ്ടെത്തുകയായിരുന്നു.

വാൽമീകി കോർപ്പറേഷൻ്റെ അക്കൗണ്ടിൽ നിന്ന് ഹൈദരാബാദിലെ ഫസ്റ്റ് ഫിനാൻസ് ക്രെഡിറ്റ് കോ-ഓപ്പറേറ്റീവ് സൊസൈറ്റിയുടെ (FFCCSL) വിവിധ അക്കൗണ്ടുകളിലേക്ക് 94.73 കോടി രൂപ കൈമാറിയിട്ടുണ്ടെന്നാണ് കണ്ടെത്തൽ. കേസിൽ അന്വേഷണം പുരോഗമിക്കുകയാണ്. കേസിൽ അറസ്റ്റിലായ സത്യനാരായണ വർമ്മയാണ് മുഖ്യപ്രതി എന്നാണ് വിവരം. ഇയാളുടെ കൂട്ടാളിയായ സായ്തേജ് ഹൈദരാബാദിൽ അറസ്റ്റിലായിരുന്നു.

ഇരുവർക്കും പുതിയ ബാങ്ക് അക്കൗണ്ട് തുറക്കുന്നതിലും പണം കൈമാറുന്നതിലും പങ്കുണ്ടെന്ന് അന്വേഷണ സംഘം കണ്ടെത്തിയിരുന്നു. ക്ഷീര കർഷകരുടെയും മറ്റ് സാധാരണക്കാരുടെയും അക്കൗണ്ടിലേക്ക് 5 ലക്ഷം മുതൽ 2 കോടി രൂപ വരെ കൈമാറിയിട്ടുണ്ടെന്നാണ് വിവരം. വാൽമീകി പട്ടികവർഗ വികസന കോർപ്പറേഷൻ ഉദ്യോഗസ്ഥനായ ചന്ദ്രശേഖറിന്‍റെ ആത്മഹത്യയ്‌ക്ക് പിന്നാലെയാണ് കോർപറേഷനിൽ അഴിമതി നടന്നതായി വ്യക്തമായത്.