തമിഴ്‌നാട് :തിരുവാണ്‍മിയൂരില്‍ പ്രായപൂർത്തിയാകാത്ത പെൺകുട്ടികൾക്ക് നേരെ ലൈംഗികാതിക്രമം. മൂന്ന് പെൺകുട്ടികളാണ് പീഡനത്തിന് ഇരകളായത്. 7നും 10നും ഇടയിൽ പ്രായമുള്ള പെൺകുട്ടികളാണിവര്‍. ഇതില്‍ ഒരു പെൺകുട്ടിയുടെ പിതാവിന്‍റെ പരാതിയിൽ നീലങ്ങരൈ ഓൾ വനിതാ പൊലീസ് സ്‌റ്റേഷനിൽ കേസ് രജിസ്റ്റർ ചെയ്‌തു.
അതേസമയം പ്രതിയെ കുറിച്ചുള്ള വിവരങ്ങളൊന്നും ലഭ്യമല്ല. കഴിഞ്ഞ രണ്ടുവർഷമായി കുട്ടികള്‍ സ്‌കൂൾ പരിസരത്തുവച്ച് ലൈംഗികാതിക്രമം നേരിട്ടിരുന്നതായാണ് വിവരം. 10 വയസുകാരിയായ പെൺകുട്ടി പഠിക്കുന്ന സ്‌കൂളിലെ ഒരു ഒൻപത് വയസുകാരനോടൊപ്പം വരുന്നയാളാണ് പെൺകുട്ടികളെ പീഡനത്തിന് ഇരകളാക്കിയതെന്നാണ് സംശയിക്കുന്നത്.
സംഭവം പുറത്തുപറഞ്ഞാൽ അവരെയും കുടുംബത്തെയും കൊല്ലുമെന്ന് ഭീഷണിപ്പെടുത്തിയിരുന്നുവെന്നും അതിനാലാണ് ഇത്രയും കാലം പീഡന വിവരം കുട്ടികള്‍ വെളിപ്പെടുത്താതിരുന്നതെന്നുമാണ് പൊലീസ് വൃത്തങ്ങളിൽ നിന്ന് ലഭിക്കുന്ന വിവരം. പോക്‌സോ, ഐപിസി എന്നിവയിലെ വകുപ്പുകൾ പ്രകാരമാണ് കേസെടുത്തത്. പ്രതിയെ കണ്ടെത്തുന്നതിനായി മൂന്ന് പ്രത്യേക സംഘങ്ങൾ രൂപീകരിച്ച് അന്വേഷണം നടത്തിവരികയാണെന്ന് നീലങ്ങരൈ പൊലീസ് അറിയിച്ചു.