ന്യൂഡല്‍ഹി: കശ്‌മീരിനെ പ്രത്യേക രാഷ്ട്രമായി അംഗീകരിക്കുന്ന ഹംഗേറിയൻ-അമേരിക്കൻ വ്യവസായി ജോർജ് സോറോസ് ഫൗണ്ടേഷന്‍റെ ധനസഹായത്തോടെ പ്രവർത്തിക്കുന്ന ഒരു സംഘടനയുമായി കോൺഗ്രസ് മുൻ അധ്യക്ഷ സോണിയാ ഗാന്ധിക്ക് ബന്ധമുണ്ടെന്ന ആരോപണവുമായി ബിജെപി. സോണിയാ ഗാന്ധിയുടെ ഇത്തരം ബന്ധം ഇന്ത്യയുടെ ആഭ്യന്തര കാര്യങ്ങളില്‍ വിദേശ ശക്തികള്‍ ഇടപെടുന്നതിന് കാരണമാകുമെന്ന ആരോപണം ബിജെപി ഉന്നയിച്ചു.
'സോണിയ ഗാന്ധിയും കശ്‌മീർ ഒരു സ്വതന്ത്ര രാഷ്ട്രമെന്ന ആശയത്തെ പിന്തുണച്ച ഒരു സംഘടനയും തമ്മിലുള്ള ഈ ബന്ധം ഇന്ത്യയുടെ ആഭ്യന്തര കാര്യങ്ങളിൽ വിദേശ സ്ഥാപനങ്ങളുടെ സ്വാധീനവും അത്തരം ബന്ധങ്ങളുടെ രാഷ്ട്രീയ സ്വാധീനവും പ്രകടിപ്പിക്കുന്നു,' എന്ന് ബിജെപി പങ്കുവച്ച ട്വീറ്റില്‍ വ്യക്തമാക്കുന്നു.
രാജീവ് ഗാന്ധി ഫൗണ്ടേഷനിലെ സോണിയാ ഗാന്ധിയുടെ അധ്യക്ഷ സ്ഥാനമാണ് ജോര്‍ജ് സോറോസ് ഫൗണ്ടേഷനുമായുള്ള പങ്കാളിത്തത്തിലേക്ക് നയിച്ചതെന്നും ബിജെപി ആരോപിക്കുന്നു. മാധ്യമ പോര്‍ട്ടലായ ഓര്‍ഗനൈസ്‌ഡ് ക്രൈം ആന്‍ഡ് കറപ്ഷന്‍ റിപ്പോര്‍ട്ടിങ് പ്രോജക്‌ടും (ഒസിആര്‍പി) ഹംഗേറിയന്‍-അമേരിക്കന്‍ വ്യവസായിയും പ്രതിപക്ഷവുമായി ഒത്തുകളിച്ച് ഇന്ത്യയുടെ സമ്പദ് വ്യവസ്ഥയെ തകര്‍ക്കാനും മോദി സര്‍ക്കാരിനെ അപകീര്‍ത്തിപ്പെടുത്താനും ശ്രമിക്കുകയാണ്. സോറോസ് ഫണ്ട് ചെയ്യുന്ന ഓപ്പൺ സൊസൈറ്റി ഫൗണ്ടേഷന്‍റെ വൈസ് പ്രസിഡന്‍റ് സലിൽ ഷെട്ടി രാഹുൽ ഗാന്ധിക്കൊപ്പം ഭാരത് ജോഡോ യാത്രയിൽ പങ്കെടുത്തതായും ബിജെപി ആരോപിച്ചു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
'അദാനിയെക്കുറിച്ചുള്ള രാഹുലിന്‍റെ വാർത്താസമ്മേളനം തത്സമയം സംപ്രേഷണം ചെയ്‌തത് ജോർജ്ജ് സോറോസിന്‍റെ ഫണ്ട് ഒസിസിആർപി ആണ്. അദാനിയെ വിമർശിക്കാൻ വിദേശ സംഘടനയുടെ സഹായം രാഹുൽ ഉപയോഗിച്ചു. ഇത് ഇന്ത്യൻ സമ്പദ്‌വ്യവസ്ഥയെ അട്ടിമറിക്കാനുള്ള അവരുടെ ശ്രമങ്ങളെ എടുത്തുകാണിക്കുന്നു, ജോർജ് സോറോസും രാഹുലും അദാനി വിഷയത്തിൽ ഒരേ നിലപാട് ആണ് സ്വീകരിക്കുന്നത്,' എന്നും ട്വീറ്റിൽ പറയുന്നു.
'ഇന്ത്യാ വിരുദ്ധ ശക്തികൾക്കെതിരെ ഒന്നിക്കണം'