അമൃത്സർ: സുവർണ ക്ഷേത്രത്തിന്റെ പരിസരത്ത് യോഗ ചെയ്യുന്നതിന്റെ വീഡിയോ പോസ്റ്റ് ചെയ്തതിന് പിന്നാലെ സോഷ്യൽ മീഡിയ ഇൻഫ്ളുവൻസർ അർച്ചന മക്വാനക്കെതിരെ പ്രതിഷേധം. അർച്ചന മക്വാന സുവർണ ക്ഷേത്രത്തിന്റെ പശ്ചാത്തലത്തില് യോഗാസനത്തിൽ ഇരിക്കുന്ന ഫോട്ടോകൾ സോഷ്യൽ മീഡിയയിൽ പോസ്റ്റ് ചെയ്തിരുന്നു. പിന്നാലെ സിഖ് സമൂഹത്തിൽ നിന്ന് കടുത്ത പ്രതിഷേധമാണ് ഉയര്ന്നത്.
അർച്ചനയുടെ പോസ്റ്റുകൾ അതിവേഗം വൈറലായി, ശക്തമായ പ്രതിഷേധങ്ങളാണ് പോസ്റ്റിന് പിന്നാലെ എത്തിയത് . സുവർണ ക്ഷേത്രം നിയന്ത്രിക്കുന്ന ശിരോമണി ഗുരുദ്വാര പർബന്ധക് കമ്മിറ്റി അർച്ചനയുടെ പ്രവൃത്തികൾ തങ്ങളുടെ വിശുദ്ധ സ്ഥലത്തിന്റെ പരിശുദ്ധിയുടെയും ചരിത്രപരമായ പ്രാധാന്യത്തിന്റെയും കളങ്കപ്പെടുത്തലാണെന്ന് കുറ്റപ്പെടുത്തി.
ഹർമന്ദിർ സാഹിബിന്റെ സുവർണ ക്ഷേത്ര മാനേജർ ഭഗവന്ത് സിങ് പൊലീസിൽ പരാതി നൽകുകയും ഇന്ത്യൻ ശിക്ഷാനിയമം 295-എ വകുപ്പ് പ്രകാരം അർച്ചന മക്വാനയ്ക്കെതിരെ കേസ് രജിസ്റ്റർ ചെയ്യുകയും ചെയ്തു. മതവികാരം വ്രണപ്പെടുത്താൻ ഉദ്ദേശിച്ചുള്ള ബോധപൂർവമായ പ്രവൃത്തികൾക്ക് ചുമത്തുന്ന വകുപ്പാണിത്. സംഭവത്തെ തുടർന്ന് എസ്ജിപിസി മൂന്ന് ജീവനക്കാരെ സസ്പെൻഡ് ചെയ്യുകയും സംഭവത്തെക്കുറിച്ച് അന്വേഷിക്കാൻ ഉത്തരവിടുകയും ചെയ്തു.