ന്യൂഡല്‍ഹി: പ്രത്യക്ഷമായും പരോക്ഷമായും പൊതുജനങ്ങള്‍ക്ക് വന്‍തോതില്‍ ധനസഹായം നല്‍കാമെന്ന വിധത്തിലുള്ള വാഗ്‌ദാനങ്ങള്‍ ഒരു രാഷ്‌ട്രീയ കക്ഷി തങ്ങളുടെ തെരഞ്ഞെടുപ്പ് പ്രകടന പത്രികയില്‍ വാഗ്‌ദാനം ചെയ്യുന്നത് തികച്ചും അഴിമതിയാണെന്ന് സുപ്രീം കോടതി. വിഷയത്തില്‍ സമര്‍പ്പിച്ച ഹര്‍ജി സ്വീകരിക്കാന്‍ കോടതി വിസമ്മതിച്ചു.
സമര്‍പ്പിക്കപ്പെട്ട രേഖകളും പരാതിക്കാരനായ ശശാങ്ക ജെ ശ്രീധറിന്‍റെ അഭിഭാഷകന്‍റെ വാദമുഖങ്ങളും തങ്ങള്‍ വിശദമായി പരിശോധിച്ചതായി ജസ്‌റ്റിസുമാരായ സൂര്യകാന്തും കെ വി വിശ്വനാഥും ഉള്‍പ്പെട്ട ഡിവിഷന്‍ ബെഞ്ച് പറഞ്ഞു. ഈ മാസം പതിനേഴിനാണ് ഈ വിധിയുണ്ടായത്. ഇപ്പോഴാണ് പരമോന്നത കോടതിയുടെ വെബ്സൈറ്റില്‍ ഉത്തരവ് അപ്‌ലോഡ് ചെയ്‌തത്.
കേസിൽ ഇത്തരമൊരു ചോദ്യം വിശദമായി പരിഗണിക്കാൻ താൽപ്പര്യമില്ലെന്ന് ചൂണ്ടിക്കാട്ടി സുപ്രീം കോടതി പറഞ്ഞതിങ്ങനെ: “ഏതായാലും ഈ കേസുകളുടെ വസ്‌തുതകളിലും സാഹചര്യങ്ങളിലും, ഞങ്ങൾ അത്തരമൊരു ചോദ്യത്തിലേക്ക് വിശദമായി പോകേണ്ടതില്ല. അതനുസരിച്ച്, അപ്പീലുകൾ നിരസിച്ചു." എങ്കിലും, ഉചിതമായ കേസുകളില്‍ തീരുമാനമെടുക്കാവുന്നതാണെന്നും നിയമവൃത്തങ്ങളോട് ബെഞ്ച് വ്യക്തമാക്കി.